अरपा महोत्सव ले गौरेला-पेण्ड्रा-मरवाही ल मिलही नवा चिनहारी : मुख्यमंत्री भूपेश बघेल

अंजोर.पेन्ड्रा। अरपा महोत्सव ले गौरेला-पेण्ड्रा-मरवाही जिला के नवा पहचान बनही, महोत्सव के नींव जेन खूबसूरती के संग राखे गे हावय अवइया बखत म येकर स्ववरूप म अऊ विस्तार संग भव्यता आही। ये बात ल प्रदेश के मुखिया श्री बघेल ह गौरेला-पेण्ड्रा-मरवाही जिला के स्थापना के प्रथम वर्षगांठ के मउका म आयोजित अरपा महोत्सव ल सम्बोधित करत किहिन। 

ये मउका म ओमन डॉ. भंवरसिंह पोर्ते के सुरता म स्थापित महाविद्यालय अउ स्कूल म प्रतिमा लगाये घोसना करिन। पेन्ड्रा म आयोजित दो दिवसीय अरपा महोत्सव के समापन समारोह ल संबोधित करत श्री बघेल ह किहिन के गौरेला-पेण्ड्रा-मरवाही ल छत्तीसगढ़ बनते ही जिला बनाना रिहिसे फेर येकर उपेक्षा करे गिस। राज्य म नवा सरकार के बनते ही वर्ष 2020 म क्षेत्र के लोगन के नवा जिला के सपना पूरा होइस। येकर ले क्षेत्र के विकास ल गति मिलीस, पूरा ताकत ले विकसित करबो। साथ ही जिला ल पर्यटन जिला के रूप म तको विकसित करे करे जाही। 

मुख्यमंत्री ह यहू बात ल किहिन के गुरूदेव रविन्द्र नाथ टैगोर पेण्ड्रा म अपन पत्नी के इलाज के खातिर डेढ़ साल इहां रूके रिहिसे। निस्संदेह उंकर रचना म इहां के प्राकृतिक वातावरण के असर पड़े होही। पत्रकारिता के पुरोधा पंडित माधवराव सप्रे के स्मृति ल चिरस्थाई बनाए रखे खातिर उंकर नाम म 50 लाख रूपिया के लागत ले प्रेस क्लब भवन के शिलान्यास होइस। उद्यानिकी कालेज स्व.श्री बिसाहू दास महंत के नाम म शुरू करे पहिली ही हो चुके हाबे। 

ये मउका म विधानसभा अध्यक्ष चरण दास महंत, राजस्व अउ गौरेला-पेण्ड्रा-मरवाही जिला के प्रभारी मंत्री जयसिंह अग्रवाल, संसदीय सचिव श्रीमती रश्मि आशीष सिंह, विधायक के.के.ध्रुव, शैलेष पाण्डेय अउ मोहित केरकेट्टा, मुख्यमंत्री के सलाहकार प्रदीप शर्मा सहित पंचायती राज अउ नगरीय संस्था के जनप्रतिनिधि अउ बड़ संख्या म आम नागरिक उपस्थित रिहिन।