महिला समूह के बनाये जिनिस के बिकरी खातिर शुरू होही ‘सीजी मार्ट’ : भूपेश बघेल

अंजोर.रायपुर। मुख्यमंत्री भूपेश बघेल ह गौठान म महिला समूह कोति ले तइयार उत्पाद, वन क्षेत्र के समूह के लघु वनोपज के प्रसंस्करण ले तइयार करे उत्पाद जइसे शहद, वनौषधि, बस्तर शिल्प के कलाकृति, हैण्डलूम वस्त्र, कोसा वस्त्र जइसे विशिष्ट उत्पाद शहरी क्षेत्र म एकेच छत के नीचे बिकरी खातिर उपलब्ध कराये बर ‘सीजी मार्ट’ शुरू करे के निर्देश दे हाबे। ओमन किहिन के सीजी मार्ट म महिला मनके उत्पाद के बिकरी होए ले उनला फायदा होही। सीजी मार्ट पहिली राजधानी रायपुर, फेर संभाग अउ जिला स्तर म शुरू करे जाए। सीजी मार्ट म तेलघानी ले सरसो, अलसी, राई के तेल तको बिकरी खातिर रखे जाही। जानबा होवय के राज्य शासन ह हाल म ही तेलघानी बोर्ड के गठन के फैसला ले हावय।

मुख्यमंत्री ह अपन निवास कार्यालय म आयोजित समारोह म गोधन न्याय योजना के हितग्राही मनला ग्यारहवीं अउ बारहवीं किश्त के राशि अंतरण के बाद संबोधित करत रिहिस। ओमन गोबर विक्रेता मनला ल ग्यारहवीं किश्त के रूप म 16 ले 31 दिसम्बर तक गोबर बिकरी के राशि 4.51 करोड़ रूपिया अउ बारहवीं किश्त के रूप म 01 जनवरी ले 15 जनवरी तक के राशि 3.02 करोड़ रूपिया ये प्रकार ले कुल 7.53 करोड़ रूपिया के राशि गोबर विक्रेता मनके खाता म ऑनलाइन अंतरित करिन। जेकर मिलके अब तक गोधन न्याय योजना के अंतर्गत किसान अउ पशुपालक ल 71 करोड़ 72 लाख रूपिया के राशि दे जा चुके हावय।

कार्यक्रम म कृषि अउ जलसंसाधन मंत्री रविन्द्र चौबे, खाद्य मंत्री अमरजीत भगत, उद्योग मंत्री कवासी लखमा, महिला अउ बाल विकास मंत्री श्रीमती अनिला भेंड़िया, विधायक अमितेश शुक्ला, देवव्रत सिंह, मुख्यमंत्री के सलाहकार प्रदीप शर्मा, छत्तीसगढ़ खनिज विकास निगम के अध्यक्ष गिरीश देवांगन, कृषि उत्पादन आयुक्त डॉ. एम. गीता, मुख्यमंत्री के सचिव सिद्धार्थ कोमल सिंह परदेशी, इंदिरा गांधी कृषि विश्वविद्यालय के कुलपति डॉ. एस.के. पाटिल अउ कुल सचिव प्रभाकर सिंह तको उपस्थित रिहिन।