शिक्षा के अधिकार अधिनियम के रा‍शि निजी स्कूल ल पठोइस ऑनलाइन

अंजोर.रायपुर। शिक्षा के अधिकार अधिनियम के तहत आज प्रदेश के 5 हजार 403 निजी स्कूल के शिक्षण शुल्क के प्रतिपूर्ति राशि 101 करोड़ रूपिया सीधा उंकर खाता म ऑनलाइन ट्रान्सफर शिक्षा मंत्री डॉ. प्रेमसाय टेकाम के हाथ ले कराये गिस। छत्तीसगढ़ म कोरोना काल म 51,985 बच्चा मनला प्रवेश देवाके व्यवस्थित तरीका ले ऑनलाइन राशि भेजी गिस। मिले आरो के मुताबिक अब तक शिक्षा के अधिकार के तहत 33 लाख 65 हजार 552 विद्यार्थी लाभान्वित होए हाबे।

जानबा होवय के शिक्षा के अधिकार के मामला म छत्तीसगढ़ के माडल ल ओडिशा, झारखण्ड अउ आसाम राज्य म तको अपनाये जात हावय। ये मउका म स्कूल शिक्षा मंत्री के आवास कार्यालय म आयोजित कार्यक्रम म संचालक लोक शिक्षण अउ समग्र शिक्षा के प्रबंध संचालक जितेन्द्र कुमार शुक्ल, कार्यक्रम के सहायक संचालक अउ नोडल अधिकारी अशोक कुमार बंजारा, सहायक संचालक प्रशांत पाण्डेय, बैंक के अधिकारी अउ इन्डस एक्शन संस्था के पदाधिकारी उपस्थित रिहिन।

स्कूल शिक्षा मंत्री प्रेमसाय सिंह टेकाम ह किहिन के छत्तीसगढ़ म पहली बार शिक्षा के अधिकार के राशि ऑनलाइन स्कूल ल प्रदान करे गे हावय। मंत्री टेकाम ह बताइन के लंबा समय ले ये मांग बार-बार आत रिहिसे के निजी स्कूल म शिक्षा के अधिकार के तहत् अवइया वंचित वर्ग के बच्चा मनके फीस समय म नइ मिले किके। ये सेती राशि ल सीधा खाता म भुगतान के व्यवस्था करे गे हावय। येकर ले पूर व्यवस्था पारदर्शी होही। कोरोना काल के बावजूद वर्तमान शैक्षणिक सत्र म जनवरी 2021 के स्थिति म 51 हजार 985 बच्चा प्रवेश ले चुके हावय।