कोदो-कुटकी के तको न्यूनतम समर्थन मूल्य घोषित होही अउ कुटरू, गंगालूर ह बनही तहसील : मुख्यमंत्री भूपेश बघेल

अंजोर.बीजापुर। मुख्यमंत्री भूपेश बघेल ह आज बीजापुर म आयोजित आमसभा ल संबोधित करत किहिन हावय के ए साल ले कोदो-कुटकी के तको न्यूनतम समर्थन मूल्य घोषित करे जाही अउ बीजापुर जिला म कुटरू अउ गंगालूर ल तहसील बनाये जाही। ओमन बीजापुर म होए विकास बुता लोहा डोंगरी, महादेव तालाब के उन्नयन अउ सौंदर्यीकरण सहित जिला के 12 तालाब के गहरीकरण अउ सौंदर्यीकरण बर राशि स्वीकृत करे अउ जिला म 10 सड़क के विकास अउ भैरमगढ़, आवापल्ली अउ मंदेर म बस स्टैण्ड निर्माण के घोषणा तको करिन। संग म तोंगपल्ली अउ भद्रकाली म धान खरीदी खातिर उपार्जन केन्द्र स्थापित करे के मंजूरी तको दीस।

कार्यक्रम म आगू मुख्यमंत्री बघेल किहिन के बस्तर संभाग के विकास कार्य खातिर कोनो कमी नी होवन देवन। बस्तर के संस्कृति-सभ्यता, इहां के लोगन के विकास के साथ-साथ शिक्षा, स्वास्थ्य अउ खेलकूद ल बढ़ावा देके बुता सर्वोच्च प्राथमिकता ले करे जाही। बस्तर म प्रतिभा के कमी नइये, सिर्फ अवसर दे के आवश्यकता हावय। सरकार बस्तरवासी मनके बेहतरी खातिर हरसंभव प्रयासरत हावय अउ अवसर उपलब्ध कराये खातिर तको प्रतिबद्ध हावन। जल, जंगल अउ जमीन म स्थानीय लोगन ल अधिकार दे खातिर शासन वन अधिकार सामुदायिक व व्यक्तिगत पट्टा देवत हावय। बस्तर म भूमिहीन लोगन ल भूमि के अधिकार देके बुता सरकार करत हावय।

सरकार कोति ले 52 प्रकार के लघु वनोपज ल न्यूनतम समर्थन मूल्य म खरीदे जात हावय। कोरोनाकाल म ग्रामीण महुआ, इमली के तको संग्रहण करे गिस। बीजापुर म बांस ले जुड़े रोजगार व्यवसाय ले 8 हजार ले जादा लोगन लाभान्वित होत हावय। ये मउका म राजस्व मंत्री अउ बीजापुर जिला के प्रभारी मंत्री जयसिंह अग्रवाल, उद्योग मंत्री कवासी लखमा, सासंद बस्तर दीपक बैज, विधायक बीजापुर विक्रम शाह मण्डावी ह आमसभा ल संबोधित करिन। अउ कार्यक्रम म बस्तर विकास प्राधिकरण के उपाध्यक्ष संतराम नेताम, जिला पंचायत अध्यक्ष शंकर कुड़ियम, बस्तर कमिश्नर जी.आर. चुरेन्द्र, आईजी पी.सुन्दरराज, कलेक्टर रितेश कुमार अग्रवाल, पुलिस अधीक्षक कमलोचन कश्यप अउ जनप्रतिनिधि सहित बड़ संख्या म ग्रामीण उपस्थित रिहिन।