कोरोना योद्धा मनके आरंग म मंत्री डॉ शिवकुमार डहरिया करिस सम्मान

अंजोर.रायपुर। नगरीय प्रशासन, विकास अउ श्रम विभाग मंत्री डॉ शिवकुमार डहरिया ह कोसल साहित्य कला मंच आरंग के कार्यक्रम म शामिल होइन। ये मउका म ओमन कोविड-19 के संक्रमण ल रोके खातिर जबर बुता करइया योद्धा मनके सम्मान करिन। कोरोना योद्धा सम्मान कार्यक्रम अपन विचार रखत मंत्री डॉ. डहरिया ह किहिन के कोरोना जइसन खतरनाक बीमारी के रोकथाम म अपन सहयोग देना बहुत ही सराहनीय अउ प्रशंसनीय कार्य आए। येकर मैं सबो कोरोना वारियर्स ल बधाई देवत हवं। 

आगू ओमन किहिन के छत्तीसगढ़ म कोरोना के रोकथाम खातिर मुख्यमंत्री श्री भूपेश बघेल के नेतृत्व म पूरा रणनीति के साथ कार्य करे गे हावय। आन राज के तुलना म हमर इहां कोविड ले बचाव खातिर अस्थाई अस्पताल बनाए गे हावय। जन जागरूकता बगराये जावत हाबे अउ मास्क अनिवार्य करे गे हावय। मुख्यमंत्री ह अधिकारी मनके बइठक लेकर के न सिर्फ कोविड के समीक्षा करत हाबे, जरूरी निर्देश तको देवत हाबे। ओमन बताइन के आरंग विकासखंड म तको कोरोना के रोकथाम बने बुता करे गे हावय। जेमा कौशल साहित्य कला मंच के तको सहयोग हावय, हम सबो ल विपरीत समय म एक दूसर के सेवा जरूर करना चाही। 

कार्यक्रम म अध्यक्ष विनोद गुप्ता ह मंच के गतिविधी के आरो दिस तेकर पाछू मंत्री डॉ डहरिया ह आरंग नगर के 108 कोरोना योद्धा मनला सम्मान पत्र देके सम्मानित करिन। जेमा प्रमुख रूप ले चंद्रशेखर चंद्राकर, खिलेश देवांगन, नरसिंह साहू,शरद गुप्ता रोशन चंद्राकर, राम कुमार गुप्ता, विनोद गुप्ता, पवन साहू, वीरेंद्र वर्मा, टुकेश्वर लोधी, अब्दुल कादिर, विनायक शर्मा, नरेंद्र बंजारा, किरण कौशिक, सौरभ शर्मा, एलडी दीवान, डॉ रॉय, रीमा मरकाम, मीना साहू, मनीष स्वर्णकार, समीर गौरी, सजल चंद्राकर लक्ष्मण पाल मन सम्मानित होइन।