राम वन गमन पथ रथ अउ बाईक रैली ल झण्डी दिखाकर रवाना करिन मुख्यमंत्री

अंजोर.सूरजपुर। सूरजपुर प्रवास के बखत म मुख्यमंत्री भूपेश बघेल कोति ले श्री राम वन गमन पथ के अंतर्गत सूरजपुर के श्री राम मंदिर म पूजा अर्चना करे गिस अउ कोरिया ले सूरजपुर पहुंचे रथ अउ विराट बाईक रैली ल हरियर झण्डी दिखाके रवाना करिन। ये रैली सीतामढ़ी हरचौका जिला कोरिया ले सुरू होके एन.एच.43 टेगनी चौक (शिवप्रसादनगर के पास) सूरजपुर जिला सीमा पहुंचही येकर बाद सरगुजा जिला म प्रवेश करही। 

मुख्यमंत्री श्री बघेल ह किहिन के मोला बड़ प्रसन्नता हावय, के भगवान श्री राम छत्तीसगढ़ म अपन वनवास काल के दौरान निवास करे हाबे। इहां के लोगन बने पर्यटन के खातिर विदेस तक जाथे जबकि हमर छत्तीसगढ़ म पर्यटन के बहुत अकन संभावना हाबे जेमा एक संभावना श्री राम पभु के वन गमन पथ के हावय, अउ लगभग येकर 1500 कि.मी. के लम्बाई हावय, जेला विकसित करे के राज्य सरकार ह संकल्प ले हावय, अउ येकर अंतर्गत विकसित करे खातिर 9 जिला के चयन तको करे गे हावय जिहां येला विकसित करे जाही अउ ये पर्यटन, धार्मिक अउ हमर संस्कृति के हिसाब ले भी देखन त बहुत ही उत्तम कार्य होत हावय। छत्तीसगढ़ के एक विषेशता रेहे हावय, के हर युग म छत्तीसगढ़ के महत्ता रेहे हावय, अउ हमन ये संकल्प हावय, के छत्तीसगढ़ इही महत्व अउ हमर संस्कृति ल श्री राम वन गमन पथ के माध्यम ले पुरा दुनिया तक पहुंचाही। ये मउका म पंचायत मंत्री टी.एस. सिंहदेव, उच्च शिक्षा मंत्री अउ जिला के प्रभारी मंत्री उमेश पटेल, स्कूल शिक्षा मंत्री डॉ. प्रेमसाय सिंह टेकाम, खाद्य मंत्री अमरजीत भगत, नगरीय प्रशासन मंत्री डॉ. शिव डहरिया, संसदीय सचिव द्वय पारसनाथ राजवाड़े चिंतामणी महराज, सरगुजा विकास प्राधिकरण के उपाध्यक्ष बृहस्पत सिंह, नगरपालिका अध्यक्ष श्री के.के. अग्रवाल उपस्थित रिहिन।