अंजोर.रायपुर। मुख्यमंत्री भूपेश बघेल के मंशा के अनुरूप प्रदेश के वनवासी मनके हित ल ध्यान म रखत राज्य सरकार ह छत्तीसगढ़ म 31 ले बढ़ाके 38 लघु वनोपज के खरीदी समर्थन मूल्य म करे साथ-साथ संघ कोति ले निर्धारित समर्थन मूल्य के अंतर्गत 14 लघु वनोपज के खरीदी के अहम निर्णय ले हावय। वन मंत्री मोहम्मद अकबर ह बताइन के छत्तीसगढ़ म लगभग दू बछर म समर्थन मूल्य म खरीदी खातिर लघु वनोपज के संख्या 7 ले बढ़ाके 52 कर दे गे हावय।
जानबा हावय के राज्य सरकार कोति ले छत्तीसगढ़ म निर्धारित न्यूनतम समर्थन मूल्य के तहत 31 ले बढ़के 38 लघु वनोपज म 7 नवीन लघु वनोपज कुसुमी बीज, रीठा फल(सूखा), शिकाकाई फल्ली(सूखा), सतावर जड़(सूखा), काजू गुठली, मालकांगनी बीज अउ माहुल पत्ता ल शामिल करे गे हावय। निर्धारित समर्थन मूल्य के अनुसार येमा कुसुमी बीज 23 रूपिया, रीठा फल(सूखा) 14 रूपिया, शिकाकाई फल्ली(सूखा) 50 रूपिया, सतावर जड(सूखा) 107 रूपए़, काजू गुठली 90 रूपिया, मालकांगनी बीज 100 रूपिया अउ माहुल पत्ता 15 रूपिया प्रति किलोग्राम के दर म खरीदी करे जाही। अइसने संघ कोति ले समर्थन मूल्य म 14 लघु वनोपज पलास (फूल), सफेद मूसली (सूखा), इंद्रजौ, पताल कुम्हड़ा, कुटज, अश्वगंधा, आंवला (कच्चा), सवई घास, कांटा झाडू, तिखुर, बीहन लाख-कुसुमी, बीहन लाख-रंगीनी, बेल (कच्चा) अउ जामुन (कच्चा) के खरीदी करे जाही।
ये संबंध म प्रबंध संचालक छत्तीसगढ़ राज्य लघु वनोपज संघ संजय शुक्ला ह बताइन के संघ डहर ले समर्थन मूल्य के अंतर्गत पलास (फूल) के खरीदी प्रति कोंटल 1000 रूपिया के दर म करे जाही। अइसने सफेद मूसली (सूखा) 65 हजार रूपिया, इंद्रजौ 15 हजार रूपिया, पताल कुम्हड़ा 3 हजार रूपिया अउ कुटज (छाल) एक हजार 100 रूपिया म खरीदी करे जाही। अश्वगंधा 32 हजार 500 रूपिया, आंवला कच्चा 2 हजार 800 रूपिया, सवई घास एक हजार 400 रूपिया अउ कांटा झाडू 2 हजार 300 रूपिया प्रति कोंटल के दरम खरीदी करे जाही। तिखुर प्रति कोंटल 2 हजार 500 रूपिया, बीहन लाख-कुसमी प्रति कोंटल 30 हजार रूपिया अउ बीहन लाख-रंगीनी प्रति कोंटल 22 हजार रूपिया के दर म क्रय करे जाही। येकर अलावा बेल (कच्चा) एक हजार रूपिया अउ जामुन (कच्चा) 2 हजार 300 रूपिया प्रति कोंटल के दर म खरीदी करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।