कृषि महाविद्यालय बैकुण्ठपुर के नामकरण कोरिया कुमार डॉ. रामचंद्र सिंहदेव के नाम म होही: श्री भूपेश बघेल

अंजोर.कोरिया। मुख्यमंत्री श्री भूपेश बघेल ह आज कोरिया जिला के अपन व्यस्त कार्यक्रम म जिला के विकास के खातिर करोड़ों रूपिया के लागत के विकास बुता के सौगात दीस। अउ जन आकांक्षा के अनुरूप घोषणा करके जिला वाले मनके दिल जीत लिस। श्री बघेल ह कृषि महाविद्यालय चेरवापारा परिसर म आयोजित विभिन्न विकास कार्य के लोकार्पण अउ भूमिपूजन के कार्यक्रम ल संबोधित करत कृषि महाविद्यालय चेरवापारा बैकुण्ठपुर के नामकरण कोरिया कुमार डॉ. रामचंद्र सिंहदेव के नाम म करे के घोषणा करिन। अइसने कोरिया जिला के नागपुर म शासकीय महाविद्यालय अउ चिरमिरी म उद्यानिकी महाविद्यालय के मंजूरी के घोषणा करिन। नागपुर म महाविद्यालय प्रारंभ करे के मांग भरतपुर-सोनहत के विधायक श्री गुलाब कमरो अउ चिरमिरी म महाविद्यालय प्रारंभ करे के आग्रह मनेन्द्रगढ़ विधायक श्री विनय जायसवाल ह करे रिहिन। 

कृषि महाविद्यालय परिसर म आयोजित कार्यक्रम म मुख्यमंत्री ह जिला के विकास के खातिर लगभग 222 करोड़ रूपिया के लागत के 210 विकास कार्य के लोकार्पण अउ शिलान्यास करिन अउ राज्य सरकार के केऊ ठी आन कल्याणकारी योजना के अंतर्गत 61 हितग्राही मनला 3 करोड़ 23 लाख रूपिया के सहायता राशि अउ हितग्राही मूलक सामग्री के वितरण करिन। मुख्यमंत्री ह जिला के प्रवास के बखत जिला के सोनहट विकासखण्ड के ग्राम घुघरा म 40 लाख 19 हजार रूपिया अउ  ग्राम पुसला म 22 लाख 84 हजार रूपिया के लागत ले निर्मित मल्टीयूटीलिटी सेंटर के लोकार्पण करिन। श्री बघेल ह सोनहत विकासखण्ड के ग्राम बसवाही म लगभग 20 लाख रूपिया के लागत ले निर्मित नवीन पंचायत भवन सह-राशन दुकान के लोकार्पण तको करिन। 

ये कार्यक्रम म विधानसभा अध्यक्ष डॉ चरणदास महंत, कृषि मंत्री रविन्द्र चौबे, नगरीय प्रशासन मंत्री अउ कोरिया जिला के प्रभारी मंत्री डॉ शिव कुमार डहरिया अउ आदिम जाति विकास अउ स्कूल शिक्षा मंत्री डॉ प्रेमसाय सिंह टेकाम, खाद्य मंत्री अमरजीत भगत, भरतपुर-सोनहत विधायक गुलाब कमरो, बैकुंठपुर विधायक श्रीमती अम्बिका सिंहदेव, मनेंद्रगढ़ विधायक विनय जायसवाल, चिरमिरी के महापौर श्रीमती कंचन जायसवाल तको उपस्थित रिहिन।