अंजोर.महासुमंद। थाना खल्लारी के ग्राम खुटेरी म पाछू दिन कुंआ म मिले लास के कतल के गुत्थी ल सुलझाइस पुलिस। मिले आरो के मुताबिक ये प्रेम प्रसंग के मामला आए अउ प्रेमिका के पति ह ये वारदात के मुखिया निकलिस। जानबा होवय के 28 दिसंबर के योगेश कुमार सेन के लापता होए के रिपोर्ट लिखाये गे रिहिसे। जेन ह अपन मां ल भुनेश्वरी पटेल ल ओकर घर ले लाने के बर जाथो किके गिस फेर वापस नइ आइस। गांव के लोगन म मिलजुल के खोजिस तव एक दिन बाद मनहरण पांडे के कुंआ म लास उफलाये मिलिस। जांच म पुलिस ल चोट के निशान मिलिस, तब अइसे आकब लगाइन के कोनो ह मार के फेके हाबे। अज्ञात आरोपी के विरूद्ध धारा 302,201 भादवि पंजीबद्ध करके जांच म लिये गिस।
पुलिस अधीक्षक महासमुंद ह थाना प्रभारी खल्लारी अउ सायबर सेल प्रभारी ल टीम गठित करके हत्या के पतासाजी के निर्देश दिस। पुलिस ह भुनेश्वरी ल अपन घर लाने वाले बात के पता करिस तव लेखराम पटेल उर्फ बालाराम पटेल के पत्नी भुनेश्वरी पटेल ले मृतक योगेश सेन के अवैध प्रेम पता चलिस। पूछताछ करे म पता चलिस के मृतक योगेश सेन के सेलून दुकान अउ आरोपिया भुनेश्वरी पटेल के च्वाईस सेंटर ग्राम खुटेरी मेनरोड़ म एके तिर हाबे। एक-दूसर ले गोठाबत अउ नजदकीया होए ले प्रेम संबंध होगे।
जानबा होए के बाद बदनामी के सेती मामला सांत होगे लेकिन ओ दिन फेर योगेश ह नशा हालत म भुनेश्वरी घर पहुंचगे अउ अपन संगे लेगे के ओकर पति ले ही गोठ कर दिस तब गुस्सा होके भुनेश्वरी के पति ह घर अंदर ले टंगीया निकालके मार दिस। ये घटना म लेखराम उर्फ बालाराम पटेल, भुनेश्वरी पटेल, सुरेश पटेल, उमेश पटेल ल पुलिस ह गिरफ्तार करके उंकर कब्जा ले टंगीया, खुन लगे कपड़ा तको जप्त करे हावय। ये कार्यवाही पुलिस अधीक्षक प्रफुल्ल कुमार ठाकुर के मार्गदर्शन म अति. पुलिस अधीक्षक श्रीमती मेघा टेम्भुरकर साहू अउ अनु.अधिकारी (पुलिस) महासमुन्द नारद कुमार सूर्यवंशी के निर्देशन थाना खल्लारी प्रभारी दीपा केवंट, सायबर सेल प्रभारी उप निरीक्षक संजय सिंह राजपूत, कपिश्वर पुष्प्कार, सउनि. नवधाराम खाण्डेकर, तीर्थराज गुनेन्द्र प्रआर. प्रकाश नंद, मिनेश धु्रव मुकेश पटनायक, माधवराम यादव, सतीश पांडे आर. कामता आवड़े, छत्रपाल सिन्हा, अजय जांगडे, चम्पलेश सिंह, दिनेश साहू, लाला राम कुर्रे, रमाकांत साहू, दुर्गा प्रसाद मोहंती, गणेशु बंजारे, गोविंद बेहरा, लोकेश चंद्राकर, कोमल साहू के जबर भूमिका रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।