आजादी के लड़ाई, छत्तीसगढ़ राज्य निर्माण म कुर्मी समाज के पुरखा मनके बड़का भूमिका : मुख्यमंत्री श्री बघेल

अंजोर.दुर्ग। प्रदेश के मुख्यमंत्री श्री भूपेश बघेल आज बालोद जिला के गुण्डरदेही विकासखण्ड के ग्राम सिर्री म आयोजित छत्तीसगढ़ मनवा कुर्मी क्षत्रिय समाज के 75वां वार्षिक राज अधिवोहाशन कार्यक्रम म शामिल होइन। ये मउका म समाज के वरिष्ठ जन अउ पदाधिकारी मन ह मुख्यमंत्री के आत्मीय स्वागत करिन। छत्तीसगढ़ मनवा कुर्मी क्षत्रिय समाज के वार्षिक राज अधिवेशन कार्यक्रम ल सम्बोधित करत मुख्यमंत्री ह किहिन के ये समाज के पुरख अउ विभूति मन ह केवल आजादी के लड़ाई ही नइ, बल्कि छत्तीसगढ़ राज्य निर्माण म तको महत्वपूर्ण भूमिका निभाये हावय। ओमन शिक्षा, कृषि, सहकारिता के संग-संग समाज सुधार जइसे उल्लेखनीय क्षेत्र म तको अपन बहुमूल्य योगदान दे हावय। ये मउका म मुख्यमंत्री ह ग्राम सिर्री म सामुदायिक भवन अउ नलजल योजना के स्वीकृति के घोषणा तको करिन।

मुख्यमंत्री श्री बघेल ह किहिन के राज्य सरकार ह किसान, मजदूर, महिला, बच्चा अउ ग्रामीण के संग-संग नागरिक के बेहतरी के खातिर कतको फइसला करे हाबे। धान के सबले ज्यादा कीमत छत्तीसगढ़ के किसान ल मिलत हावय। मुख्यमंत्री ह किहिन के एक दिसम्बर ले धान खरीदे व्यवस्थित ढंग ले चलत हावय। धान खरीदे के खातिर बारदाना के कमी नइ होवय। ओमन किहिन के कोनो किसान के पंजीकृत रकबे म यदि कोनो त्रुटि होही त ओला जांच करके सुधार करे जाही। ओमन किहिन के ग्रामीण अर्थव्यवस्था म सुधार के दिशा म सुराजी गांव योजना के शुरूआत करे गे हावय। गोधन न्याय योजना के अंतर्गत दू रूपिया प्रति किलोग्राम के दर ले गोबर खरीदे करे जात हावय। वर्मी कम्पोस्ट ले जमीन के उर्वरा शक्ति बढ़त हावय। गौठान निर्माण ले पशुधन के सुरक्षा अउ फसल के सुरक्षा होत हावय।

मुख्यमंत्री श्री बघेल ह अधिवेशन ल संबोधित गौठान म पैरादान करे के आव्हान करिन। ओमन किहिन के खेत म पैरा जलाये ले धरती के उर्वरा शक्ति कम होत हावय। पैरा झिन जलावा, पैरा ल गौठान म दान करें। पैरा ले खाद बन सकत हावय, येकर ले फसल के उत्पादन बढ़ही। मुख्यमंत्री ह छत्तीसगढ़ मनवा कुर्मी क्षत्रिय समाज युवक-युवती परिचय पत्रिका ‘‘पुष्प परिणय‘‘ के विमोचन तको करिन। अधिवेशन ल छत्तीसगढ़ राज्य महिला आयोग के अध्यक्ष श्रीमती किरणमयी नायक, गुण्डरदेही विधानसभा क्षेत्र के विधायक अउ संसदीय सचिव कुंवर सिंह निषाद, संजारी-बालोद विधानसभा क्षेत्र के विधायक श्रीमती संगीता सिन्हा, छत्तीसगढ़ मनवा कुर्मी समाज के केन्द्रीय अध्यक्ष डॉ. रामकुमार सिरमौर ह तको संबोधित करिन। ये मउका म छत्तीसगढ़ मनवा कुर्मी समाज के वरिष्ठ पदाधिकारी सहित बड़ संख्या म जनप्रतिनिधि, ग्रामीण अउ वरिष्ठ अधिकारी उपस्थित रिहिन।