पखांजूर तहसील के हाकेर राईस मिल ले एक हजार क्विंटल धान जप्त

अंजोर.कांकेर। जिला कलेक्टर के निर्देश म धान के अवैध भंडारण अउ परिवहन म सरलग कार्यवाही चलत हाबे। राजस्व, खाद्य विभाग के अधिकारी अउ मंडी के अधिकारी मनके टीम ह पाछू दिन पखांजूर तहसील हाकेर के कृष्णा राईस मिल ले 25 सौ बोरा लगभग 1 हजार क्विंटल धान ल जप्त करे गे हावय, एसो के ये सबले बड़का जप्ती के कार्यवाही आए। ये कार्यवाही म नायब तहसीलदार मोहित साहू, खाद्य निरीक्षक जतिन देवांगन अउ मंडी उप निरीक्षक बलराम कोर्राम शामिल रिहिन। टीम कोति ले धान खरीदी केन्द्र हाकेर म टोकन ले ज्यादा धान के तौलाई के मामला ल तको पकड़े गिस अउ 104 बोरा मोटा धान जप्त करे गिस। जानबा होवय के जिला प्रशासन के निर्देशानुसार स्थानीय प्रशासन ह एसो सक्रियता बरतत दिन-रात धान खरीदी केन्द्र के निरीक्षण करते हाबे। तहसीलदार के बताती पखांजूर तहसील के 05 धान खरीदी केन्द्र पी.व्ही. 32, पी.व्ही. 121, माटोली, छोटेबेठिया, कुरेनार के केन्द्र प्रभारी ल हटा दे गे हावय अउ तीन समिति प्रबंधन ल कारण बताओ नोटिस जारी करे गे हावय। अइसने बांदे समिति के एक मामला म एफआईआर तको दर्ज हो चुके हावय।