खाद्य मंत्री ह कुम्हारी म पूजा-अर्चना करके सुरू करिन समर्थन मूल्य म धान खरीदी

अंजोर.रायपुर। प्रदेशभर म एसो एक दिसंबर ले किसान ले समर्थन मूल्य म धान खरीदी सुरू होइस हावय। खाद्य मंत्री अमरजीत भगत ह आज रायपुर जिला के विकासखण्ड धरसींवा के ग्राम कुम्हारी म पूजा-अर्चना करके धान खरीदी के शुभारंभ करिन। श्री भगत ह कांटा-बाट म धान ल तौल के, किसान के तिलक लगाके उंकर उनका स्वागत करिन। ये मउका म ओमन कुम्हारी म खाद्य गोदाम निर्माण के भूमिपूजन तको करिन।

मंत्री श्री भगत के बताये मुताबिक सरकार कोति ले सबो तियारी होगे हावय, कोरोना वायरस के सुरक्षा खातिर सेनेटाईजर, मास्क अउ हाथ धुलाई के व्यवस्था तको करे गे हावय। आगू ओमन किहिन के मुख्यमंत्री भूपेश बघेल के नेतृत्व म अन्नदाता के हित म बहुत अकन निर्णय लिए गे हाबे। फेर केन्द्र कोति ले धान खरीदी खातिर उम्मीद के अनुरूप सहायता नइ मिलत हावय।

मिले आरो के मुताबिक कुम्हारी उपार्जन केन्द्र म चार गांव के 511 किसान धान बेचे खातिर पंजीकृत हाबे। इहां रोज 500 क्विंटल धान खरीदी करे जाही। खरीदी केन्द्र म नवा चबूतरा के निर्माण करे गे हावय। ये कार्यक्रम धरसींवा विधायक श्रीमती अनिता योगेन्द्र शर्मा, जिला पंचायत अध्यक्ष श्रीमती डोमेश्वरी वर्मा, सदस्य हरिशंकर निषाद, जनपद सदस्य धरसींवा श्रीमती योगिता ईश्वर निषाद, कुम्हारी के सरपंच श्रीमती शिवकुमारी बालाराम पाठक, कुम्हारी समिति के अध्यक्ष चंद्रशेखर शुक्ला संग अऊ गजब झिन जनप्रतिनिधि अउ किसान जुरियाए रिहिन।