एन्टी करप्शन ब्यूरो के पहिली छत्तीसगढ़ी वेबसाईट के होइस लोकार्पण, ऑनलाइन होही अब शिकायत

अंजोर.रायपुर। मुख्यमंत्री श्री भूपेश बघेल ह आज विश्व भ्रष्टाचार निवारण दिवस के मउका म अपन निवास कार्यालय म एन्टी करप्शन ब्यूरो अउ राज्य आर्थिक अपराध अन्वेषण ब्यूरो के वेबसाईट www.acbeow.cg.gov.in के लोकार्पण करिन। ये वेबसाईट छत्तीसगढ़ी भाषा म सरकार के पहिली वेबसाईट हावय। येमा जाके कोनो भी अपन शिकायत दर्ज कर सकत हाबे अउ कार्रवाई के संबंध म जानकारी ले सकत हाबे। जनता कोति ले भ्रष्टाचार के शिकायत अउ जागरूकता खातिर हेल्पलाईन नंबर 1064 अउ व्हाट्सअप नंबर 8827461064 तको मुख्यमंत्री श्री बघेल ह लॉन्च करिन।

ये कार्यक्रम म ओमन भ्रष्टाचार के प्रति जनता म जागरूक लाने के उद्देश्य ले एक पोस्टर के विमोचन करिन। से पोस्टर ल सबो शासकीय कार्यालय म लगाये जाही ताकि लोगन के भ्रष्टाचार संबंधित शिकायत ऑनलाइन दर्ज हो सकें। ये मउका म मुख्यमंत्री राहत कोष बर ईओडब्ल्यू अउ एसीबी के अधिकारी-कर्मचारी कोति ले सकेले एक लाख 25 हजार रूपिया के सहयोग राशि के चेक मुख्यमंत्री ल सौंपे गिस। 

मुख्यमंत्री श्री बघेल ह ये मउका म कहिन के आर्थिक अनियमितता अउ भ्रष्टाचार के विरुद्ध आर्थिक अपराध अन्वेषण ब्यूरो अउ एंटी करप्शन ब्यूरो डहर ले होवत कार्रवाई के जानकारी अब वेबसाइट के माध्यम ले तको सर्व-सुलभ होही। लोगन मन भ्रष्टाचार ले जुरे शिकायत अब ऑनलाइन दर्ज करा सकही। वेबसाइट अउ येमा प्रदर्शित हेल्प-लाइन नंबर के माध्यम ले शिकायत दर्ज कराइया म पीड़ित पक्ष ल ज्यादा आसानी होही। ये महत्वपूर्ण कदम ले प्रशासनिक बुता म तको कसावट आही। 

जानबा होवय के रिश्वत लेना अउ रिश्वत देना, ज्ञात आय के स्त्रोत ले जादा अनुपातहीन सम्पत्ति अर्जित करना, अपन पद के दुरुपयोग ले शासकीय संपत्ति के गबन, स्वयं ल या आन व्यक्ति ल लाभ पहुंचाना कानूनन अपराध हावय। ये अपराध ले सम्बंधित शिकायत या जानकारी होए म कोनो भी हेल्प लाइन नम्बर 1064, व्हाट्सएप नम्बर 8827461064 या वेबसाइट www.acbeow.cg.gov.in म शिकायत कर सकत हाबे या ई-मेल आईडी complaintacbeow@gmail.com म मेल कर सकत हाबे।