अंजोर.रायपुर। जिला रोजगार अउ स्वरोजगार मार्गदर्शन केन्द्र, रायपुर कोति ले छत्तीसगढ़ के शिक्षित बेरोजगार युवा मनला रोजगार देवाये खातिर 17 ले 19 नवम्बर के पुराना पुलिस मुख्यालय परिसर स्थित रोजगार कार्यालय, रायपुर म कार्यालयीन समय तक ऑनलाइन प्लेसमेंट कैम्प के आयोजन करे गे हावय। रोजगार कार्यालय के उप संचालक के बताये मुताबिक प्लेसमेंट कैम्प के माध्यम ले निजी क्षेत्र के नियोजक पात्रा इंडिया बी.पी.ओ. सर्विसेस प्राइवेट लिमिटेड, रायपुर कोति ले वर्कस फ्राम होम के तहत् रिमोट प्रोसेस एक्सीक्यूटीव ट्रेनी के 40 ले जादा पद म भर्ती करे जाही। जेकर बर डिग्री कोर्स, डिप्लोमा, बी.ई, बी.टेक या स्नातकोत्तर उत्तीर्ण अभ्यार्थी आवेदन कर सकत हाबे। ये पद म वेतनमान दस हजार रूपिया प्रतिमाह नियोक्ता कोति ले निर्धारित करे गे हावय।
मिले आरो के मुताबिक आवेदक करा स्वयं के कम्प्यूटर-लेपटॉप, जेमा हाई स्पीड इंटरनेट सूविधा उपलब्ध होवय संग म एम.एस. ऑफिस म दक्षता होना चाहि। ये पद म भर्ती खातिर इच्छुक आवेदक दिनांक 17, 18 अउ 19 नवम्बर के जिला रोजगार अउ स्वरोजगार मार्गदर्शन केंद्र रायपुर के कक्ष क्रमांक 5 या कार्यालय के प्लेसमेंट सेल के ईमेल आई.डी. raipurmodelcareercenter@gmail.com म तको समयावधि के भीतर अपन आवेदन जमा करवा सकत हाबे। बॉयोडाटा के आधार म योग्य आवेदक मनला नियोजक कोति ले साक्षात्कार बर आमंत्रित करे जाही। जादा जानकारी खातिर जिला रोजगार कार्यालय, रायपुर ले तको संपर्क करे जा सकत हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।