अंजोर.राजनांदगांव। छत्तीसगढ़ शासन के स्कूल शिक्षा विभाग डहर ले कोरोना काल म लइका मनला पढ़ाई ले जोड़े खातिर पढ़ई तुंहर दुआर योजना चलाये जावत हाबे। पढ़ई तुंहर दुआर योजना ल अऊ लाभदायक बनाये खातिर मोहला विकासखंड के सबो स्कूल म स्मार्ट टीवी लगाये जात हाबे ताकि बच्च मनके पढ़ाई रोचक अउ डिजिटल तरीका ले हो सके।
इही कड़ी म उरवाही संकुल के अंतर्गत ग्राम पंचायत कुंजामटोला के प्राथमिक शाला कोडेवड़ा म तको ग्रामीण, शिक्षक अउ जनप्रतिनिधी मनके सहयोग ले शाला म टीवी लगाके स्मार्ट क्लास के शुरूआत करे गिस। ये मउका म मुख्य अतिथि के रूप म संसदीय सचिव इन्द्रशाह मंडावी संग मोहला के एबीईओ राजेन्द्र कुमार देवांगन, बीआरसीसी खोमलाल वर्मा, शिक्षक राजकुमार यादव, शेख अफजल, लोकेश सिंह ठाकुर, मलेश मालेकर, नरेंद्र देवांगन अउ बंशीलाल निषाद के अलावा अऊ गजब झिन शिक्षक मन जुरियाए रिहिन।
कोरोना काल म तको पढ़ई बुता करइया शिक्षक मनला विधायक कोति ले प्रशस्ति पत्र देके सम्मानित करे गिस। जेमा प्रमुख रूप ले शिक्षा सारथी अर्जुन कुमार, ललिता उसेंडी, कुमारी काजल मांझी, कुमारी शारदा आर्य ह सम्मानित होइस। ग्राम कोड़ेवड़ा म डिजिटल पढ़ाई के पहल के श्रेय एक स्थानीय महिला नेत्री मीना मांझी अउ शिक्षक लोकेश यादव ल जाथे। दूनो के प्रोत्साहन ले ग्रामीण मन स्कूल ल 7100 रूपिया दान तको करिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।