राज्य योजना आयोग ह लॉकडाउन के कारण प्रभावित कामगार मनला सामाजिक सुरक्षा देवइया योजना के करही अध्ययन

अंजोर.रायपुर। छत्तीसगढ़ राज्य योजना आयोग के उपाध्यक्ष के अध्यक्षता म आयोजित बइठक म कोविड-19 अउ लॉकडाउन के कारण छत्तीसगढ़ के प्रवासी कामगार ल सामाजिक सुरक्षा देवइया योजना मनके अध्ययन करे के संबंध म चर्चा करे गिस। योजना आयोग म यूनाइटेड नेशंस डेवलपमेंट प्रोग्राम के सहयोग ले कोविड-19 अउ लॉकडाउन के सेती प्रवासी मजदूर के बीच समस्या के समाधान बर एक विशेष प्रकोष्ठ के स्थापना करे गे रिहिस। ये प्रकोष्ठ कामगार मनला सामाजिक सुरक्षा प्रदान करइया योजना के अध्ययन करही अउ ओमला जादा सुदृढ़ बनाये खातिर अपन अनुशंसा प्रदान करही। यूएनडीपी के वित्तीय अउ तकनीकी सहयोग ये प्रकोष्ठ म छह विषय विशेषज्ञ के नियुक्ति तको करे गे हाबे।

ये योजना के तहत पायलट के रूप म राज्य के बलरामपुर, जशपुर, कोरबा, बिलासपुर, जांजगीर चाम्पा, मुंगेली, राजनंदगांव, कांकेर अउ बस्तर जिला के नौ विकासखण्ड म लेबर रिसोर्स सेंटर के स्थापना करे जाही। शुरुआती तौर म ये केन्द्र ल स्थापित अउ संचालित करे खातिर यूएनडीपी ह समर्थन संस्था के नेतृत्व म एन जी ओ के एक समूह के चयन करे हाबे। ये सेंटर के माध्यम ले श्रमिक मनला आने-आने विभाग के सामाजिक सुरक्षा ले जुरे कार्यक्रम के जानकारी दे जाही। ये सेंटर कामगार मनके पंजीयन के साथ कौशल विकास म तको मदद करही। ये परियोजना के क्रियान्वयन बर योजना आयोग कोति ले आयोजित बइठक म योजना आयोग के अधिकारी, सबो सम्बंधित विभाग अउ चयनित एन जी ओ के प्रतिनिधी भाग लिस।