मया मोहनी म फांस के नाबालिक संग गलत काम करइया ल दबोचिस पुलिस

अंजोर.गरियाबंद। नाबालिग ल अपन मया मोहनी म फांस के, शादी करे के झांसा देके भगा के लेगइया आरोपी ल पुलिस ह गिरफ्तार करके, जेल पठोय हाबे। मिले आरो के मुताबिक आरोपी लोकू कुर्रे साकिन धुरसा थाना पाण्डूका, जिला गरियाबंद के कब्जा ले पीड़िता ल तको बरामद करे गे हावय।

आरोपी ह पीडि़ता ल भगा के उड़ीसा के धरमबांथा लेगे अउ किराये के मकान म राहत दुष्कर्म करय। पुलिस अधीक्षक गरियाबंद भोजराम पटेल के निर्देशन अउ अतिरिक्त पुलिस अधीक्षक सुखनंदन राठौर के मार्गदर्शन म थाना प्रभारी निरीक्षक वेदवती दरियो कोति ले थाना फिंगेश्वर ह पास्को एक्ट के मामला म लघियात कार्यवाही करे हावय। 1 नवंबर के प्रार्थी ल घर ले भगा ले जाके उड़ीसा धरमबांधा म किराये के मकान म अपन पत्नि बनाके राखके लगातार पीड़िता के दैहिक शोषण करइया आरोपी अब जेल म हावय।