पैरादान करके, गोधन ल सहेजे म मदद करव : दुर्ग कलेक्टर डॉ. भुरे करिन अपील

अंजोर.दुर्ग। गोधन के संवर्धन खातिर पैरादान म भागीदारी अउ सहयोग ले गौठान म गौमाता खातिर चारा उपलब्ध कराये बर एसो तको कलेक्टर सर्वेश्वर नरेंद्र भुरे ह पैरादान के अपील करिन हावय। ओमन किहिन के पाछू बच्छर तको गजब झिन किसान मन पैरादान करे रिहिन। सेवाभावी लोगन मन मिसाल कायम करत न सिरिफ पैरादान करिन बल्कि गौठान तक पहुंचाइन तको। अइसने एसो तको पुनीत कार्य म ग्रामीणजन अपन हिस्सेदारी करत, जिम्मेदारी निभाहू।

कलेक्टर श्री भुरे किहिन के अपन गौठान खातिर पैरादान महती अभियान के तरह होना चाहि, लोगन ज्यादा ले ज्यादा मात्रा म पैरादान करय। जतका संख्या म लोगन आगू आही, गौठान के बेहतर संचालन म ओतके ही मदद मिलही। गौठान के बेहतर संचालन के खातिर, गोधन न्याय योजना के बेहतर क्रियान्वयन बर ये जरूररी हावय कि गौठान म रहत गोधन ल पर्याप्त चारा मिल सकय। पराली जलाना कानूनन अपराध हावय अउ येकर विशेष मानिटरिंग तको अधिकारी मन करत हावय। दूसर कोति पैरादान म दान के सुख हावय। अपनेच गाँव के बेहतरी खातिर आगू आए के मउका हावय। पउर साल सहि‍क एसो तको पूरा प्रदेश म उत्साह ले भरे किसान मन ह पैरादान करही अइसे आकब हाबे।