तेंदुआ खाल ल बेचे के फिराक म पकड़ागे तस्कर

अंजोर.धमतरी। जंगली जानवर तेंदुआ के खड़री ल धरे बेचे खातिर गिराहिक खोजत खाल तस्कर नगरी पुलिस के हाथ लगे हावय। मिले आरो के मुताबिक मोटरसाइकिल ले कोटाभर्री रद्दा म मुखबिर के बताये ठउर म घेराबंदी करके पकड़े गिस। पुलिस अधीक्षक बी.पी. राजभानू के निर्देशन, अतिरिक्त पुलिस अधीक्षक श्रीमती मनीषा ठाकुर रावटे के मार्गदर्शन अउ पुलिस अनुविभागीय अधिकारी नगरी नीतिश ठाकुर के पर्यवेक्षण म थाना प्रभारी नगरी विनय कुमार पम्मार के नेतृत्व म थाना के टीम ह पूछताछ करिस तव ओमन अपन नाम कुंभ लाल नेताम ग्राम रतावा बताइन। 

तलाशी ले म ओकर तिर ले मोटरसाइकिल के डिग्गी अंदर सफेद रंग के बोरी म वन्य प्राणी तेंदुआ के खाल बरामद होइस। पूछताछ करे पुलिस ल कोनो संतुष्टिप्रद जवाब तको नी दे सकिस, मउका म ही कार्यवाही करत आरोपी कुंभ लाल नेताम ल धारा वन्य प्राणी संरक्षण अधिनियम के धारा 9, 39(ख), 51, 52 अउ लोक संपत्ति नुकसान निवारण अधिनियम के धारा 3 के तहत गिरफ्तार करके न्यायिक रिमांड खातिर न्यायालय म पेश करे गिस।