अंजोर.रायपुर। छत्तीसगढ़ी राजभासा दिवस के मउका म एसो प्रदेश के मुखिया भूपेश बघेल ह वर्चुअल रूप म राजभासा आयोग के कार्यक्रम म सामिल होही। 28 नवंबर के ही छत्तीसगढ़ी ल राजभासा के रूप म स्वीकारे गे रिहिस। ये दिन प्रदेश के साहित्यकार मन अपन-अपन कोति ले अनेक आयोजन करथे। इही कड़ी म छत्तीसगढ़ सरकार के छत्तीसगढ़ राजभासा आयोग तको पाछु कुछ बछर ले बड़का जलसा के आयोजन करथे। एजेंसी ले मिले आरो के मुताबिक एसो मुख्यमंत्री ह महंत घासीदास स्मारक संग्रहालय के सभागार म 11:30 बजे आयोजित गोष्ठी के अपन निवास कार्यालय ले वर्चुअल रूप म शुभारंभ करही। ये मउका म श्री बघेल ह छत्तीसगढ़ी राजभाषा के प्रचार-प्रसार, साहित्य सृजन अउ संवर्धन म महत्वपूर्ण योगदान खातिर प्रदेश के 11 विभूति मनके सम्मान तको करही।
संस्कृति मंत्री अमरजीत भगत के पहुनाई म मुख्यमंत्री श्री बघेल ह श्री नंदकिशोर शुक्ला बिलासपुर, श्री वैभव पाण्डेय बेमेतरिहा, रायपुर, डॉ. चितरंजन कर रायपुर, श्री मुकुंद कौशल दुर्ग, डॉ. परदेशीराम वर्मा भिलाई, श्री रामेश्वर वैष्णव रायपुर, श्री संजीव तिवारी भिलाई, व्याख्यता, श्री संजीव तिवारी दुर्ग अधिवक्ता, डॉ. राजन यादव खैरागढ़, श्री देवेश तिवारी रायपुर अउ सुश्री सुधा वर्मा रायपुर के सम्मान करही। कार्यक्रम म आगू महंत घासीदास स्मारक संग्रहालय सभागार म आयोजित गोष्ठी म डॉ. परदेशीराम वर्मा, वैभव पाण्डेय बेमेतरिहा, संजीव तिवारी, डॉ. चितरंजन कर अउ नंदकिशोर शुक्ला अपन विचार रखही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।