थाना कोटा पुलिस जुआ के 5 प्रकरण म 52 जुअडि़हा पकड़ीस अउ 244930 रूपिया के जप्ती

अंजोर.बिलासपुर। थाना कोटा के पुलिस टीम ह जुअडि़हा मन उपर बड़का कार्यवाही करे हावय। बावन परी के खेल खेलत 5 प्रकरण म कुल 52 आदमी पकड़ाये हाबे अउ संग म 244930 रू‍पिया उंकर तिर ले जप्ती करे गिस। एजेंसी ले मिले आरो के मुताबिक ग्राम लमकेना बाजारपारा के खुला जगह म जुअडि़हा मन रूपिया के दांव लगावत ताश म बइठे रिहिसे। मुखबीर के आरो म गांव के कोतवाल ल धरके पुलिस दबिस दीस तब कुछ आदमी मन अंधियार म भागगे। तभो ले गजब झिन ल पकड़े म पुलिस कामयाब होगे। थाना प्रभारी प्रशिक्षु भा.पु.से. गौरव राय संग पुलिस टीम के जुआ रैड म विजय चौधरी, संतोष जायसवाल, नरेन्द्र जायसवाल, चरणदास मानिकपुरी, आनंद राम जायसवाल, दिलीप जायसवाल, हरिचंद जायसवाल, अजय बंजारे, विजय बंजारे, संजय खाण्डे, सतीश अनंत, मनीष खाण्डे, भगत सिंह खाण्डे के उपर धारा 13 जुआ एक्ट के दण्डनीय पाये जाए के सेती सबो जुआडिया ल गिरफ्तार करके आगू के कार्यवाही करे गिस।