नक्सल मोर्चा म तैनात जवान मनला दे जाही छत्तीसगढ़ वॉरियर प्रशस्ति पत्र : डीजीपी अवस्थी

अंजोर.रायपुर। पुलिस महानिदेशक डीएम अवस्थी ह आज अभिनव पहल करत बस्तर के सबो जिला के कैम्प म पदस्थ जवान मनले वर्चुअल माध्यम म गोठबात करिन। ये मउका म ओमन किहिन के नक्सल मोर्चा म तैनात जवान ल पुलिस मुख्यालय कोति ले छत्तीसगढ़ वॉरियर के प्रशस्ति पत्र ले नवाजे जाही। जवान मनके वीरता अउ साहस के कोनो मोल नइये। नक्सल मोर्चा म तैनात जवान मनला उल्लेखनीय बुता खातिर आउट ऑफ टर्न प्रमोशन अऊ आन सम्मान मिल जाथे लेकिन कई अइसन जवान हाबे जेनला सम्मान नइ मिल पावे। अइसन म पुलिस मुख्यालय कोति ले असाधारण वीरता के प्रदर्शन करइया जवान मनला प्रशस्ति पत्र देके सम्मानित करे जाही। पुलिस के जवान हर दिन, हर पल लड़ाई लड़थे। दीवाली के तिहार म तको अपन परिवार ले दूरिहा नक्सल मोर्चा म मुस्तैदी ले तैनात हाबे। ओमन आगू किहिन के मैं देवारी के बाद सबो कैम्प म आके सबले मुलाकात करहू अउ हर समस्या के तत्काल हल करे जाही।

डीजीपी के वर्चुअली मुलाकात म सुकमा के फुलबागड़ी कैंप, दंतेवाड़ा के पालनार कैंप, पुलिस लाइन,  बीजापुर के गुदमा कैंप, बस्तर के तिरिया कैंप,  बास्तानार कैंप, कोंडागांव के मर्दापाल कैंप,  कांकेर के अरगूर कैंप, नारायणपुर के एसपी ऑफिस अउ राजनांदगाव के मानपुर थाना, गातापार थाना के जवान मन अपन बात रखिन। अऊ डीजीपी के आगू जवान मन आवास, स्थानान्तरण, अग्रिम राशि अउ आन मांग रखिन, जेकर तुरते निराकरण तको करे गिस।