कौन बनेगा करोड़पति म एक करोड़ जीतइया जगदलपुर निवासी श्रीमती अनूपा दास ल बस्तर महाराज दीस बधाई

अंजोर.जगदलपुर। टीवी के दुनिया के सबले चर्चित कार्यक्रम कौन बनेगा करोड़पति ह फेर एक पइत छत्तीसगढ़ के माटी ल गौरवांवित होए के मउका दे हाबे। एजेंसी ले मिले आरो के मुताबिक जगदलपुर निवासी श्रीमती अनूपा दास ह केबीसी म शानदार पारी खेलत एक करोड़ जीते हावय। श्रीमती दास के ये जीत ह छत्तीसगढ़ म नारी शक्ति के जीत आए। जानबा होवय के पाछु दिन इही कार्यक्रम म पद्मश्री फूलबासन यादव ल तको पहुना के रूप म बलाये गे रिहिस, जेमन अपन सम्मान के रा‍शि ल समाज सेवा म समर्पित कर दिस। अइसन बड़का ठउर म पहुंचना ही बहुत बड़े बात आए अऊ फेर जगदलपुर के श्रीमती अनूपा दास ह तो अपन बुद्धिमता अउ चतुराई ले एक करोड़ रूपिया जीत के नारी मनला सम्मान देवावत छत्तीसगढ़ सहित जिला के जनता के मान बढ़ाये हावय। ये मउका म आरो देवत बस्तर महाराज कमलचंद्र भंजदेव ह बधाई देवत किहिन के श्रीमती अनूपा दास अपन बुद्धिमता अउ चतुराई ले अपन महिला शक्ति के पुरजोर प्रदर्शन करे हाबे, निश्चित ही उंकर ये गौरवशाली उपलब्धि ले लाखों महिला मन म एक नवा प्रेरणा अउ ऊर्जा के संचार होही।