भीख मंगइया लइका मनके पुनर्वास खातिर मुहिम चलाही छत्तीसगढ़ बाल अधिकार संरक्षण आयोग

अंजोर.रायपुर। राज्य बाल अधिकार संरक्षण आयोग कोति ले प्रदेश के चौक चौराहा म भीख मंगई ल रोके अउ अइसन लइका मनके पुनर्वास खातिर मुहिम चलाये जाही। ये संबंध म आयोग के अध्यक्ष श्रीमती प्रभा दुबे ह वीडियो कॉन्फ्रेंसिंग के माध्यम ले पुलिस विभाग, जिला के विशेष किशोर पुलिस इकाई, बाल कल्याण समिति, बाल संरक्षण इकाई अउ महिला बाल विकास के अधिकारी ले चर्चा करके कार्यवाही खातिर मार्गदर्शन अउ निर्देश दिस।

श्रीमती दुबे ह लइका मनले आन मामला के समीक्षा करत किहिन के लइका मनके भीख मांगे के मामला के बढ़ना चिंताजनक हावय। येकर बर समेकित बाल संरक्षण इकाई, बाल कल्याण समिति, पुलिस प्रशासन, चाइल्ड हेल्प लाइन, श्रम विभाग, महिला अउ बाल विकास विभाग ल चौक चौराहा के चिन्हांकन करके विशेष कार्ययोजना बनाना होही। येकर अलावा भिक्षावृत्ति म लिप्त बच्चा के पुनर्वास के व्यवस्था करत ओमन ला मुख्य धारा म लाना होही। श्रीमती दुबे ह पोक्सो एक्ट के तहत प्रकरण म होए कार्यवाही अउ राहत, चिकित्सकीय सहायता, मुआवजा राशि देना सहित अऊ आन बिंदु म तको समीक्षा करिन।