छत्तीसगढ़ हॉकी अकादमी रायपुर ल मिलिस साई ले मान्यता, राज्य खेल प्रशिक्षण केन्द्र बिलासपुर पाइस ‘स्टेट सेंटर ऑफ एक्सिलेंस‘ के दर्जा

अंजोर.रायपुर,16। छत्तीसगढ़ राज्य के खिलाड़ी के सपना अब साकार होही लघियात रायपुर म ’आवासीय हॉकी अकादमी’ सुरू होवइया हावय। येकरे संग बहतराई बिलासपुर म ’एक्सिलेंस सेन्टर’ तको सुरू होवत हाबे। खेल अउ युवा कल्याण विभाग कोति ले खेलो इंडिया योजना के तहत रायपुर म आवासीय हॉकी अकादमी (बॉय एंड गर्ल्स), बिलासपुर म एथलेटिक, कुश्ती, तैराकी खातिर ’एक्सिलेंस सेन्टर’ के प्रस्ताव भारतीय खेल प्राधिकरण ल पठोय गे रिहिसे जेन स्वीकृति होगे हावय। एजेंसी ले मिले आरो के मुताबिक राज्य के युवा मनके खेल प्रतिभा ल निखारने अउ ओला उपयुक्त प्रशिक्षण के व्यवस्था खातिर ‘गढ़बो नवा छत्तीसगढ़‘ ह खेल के क्षेत्र म बने परगट होवत हाबे। येकर पहिली खेल अउ युवा कल्याण विभाग कोति ले तीरंदाजी बर भारतीय खेल प्राधिकरण ल प्रस्ताव भेजे रिहिसे, जेकर स्वीकृति तको आगे हावय। वर्तमान म रायपुर म तीरंदाजी के प्रशिक्षण खिलाड़ी मनला दिये जात हावय। ’वन स्टेट वन गेम’ के तहत रायपुर म तीरंदाजी खेल के विकास के कार्यवाही प्रक्रियाधीन हावय।

रायपुर म आवासीय हॉकी अकादमी, बिलासपुर म एथलेटिक, कुश्ती, तैराकी बर ’एक्सिलेंस सेन्टर’ के मान्यता मिले म मुख्यमंत्री श्री भूपेश बघेल अउ खेल मंत्री उमेश पटेल ह युवा खिलाड़ी, खेल प्रशिक्षक अउ राज्य के खेल, युवा कल्याण विभाग के अधिकारी, कर्मचारी ल बधाई दे हावय। जानबा होवय के राज्य गठन के बाद छत्तीसगढ़ म खेल अकादमी के स्थापना नी होए पाए रिहिस। मुख्यमंत्री श्री बघेल के विशेष पहल म रायपुर म छत्तीसगढ़ हॉकी अकादमी के स्थापना करे गिस, जेमा बालक अउ बालिका हॉकी खिलाड़ी ल प्रशिक्षण बर आवासीय सुविधा उपलब्ध करये जात हावय। राज्य सरकार कोति ले ये अकादमी ल भारत सरकार ले मान्यता बर सरलग प्रयास करे जावत रिहिसे। रायपुर म अंतर्राष्ट्रीय स्तर के दू सर्वसुविधायुक्त हॉकी स्टेडियम पहिली ले निर्मित होगे हावय। ये सिलसिला म भारतीय खेल प्राधिकरण अउ खेलो इंडिया के खेल विशेषज्ञ के दल ह रायपुर हॉकी अकादमी के भ्रमण करके उहां उपलब्ध खेल अधोसंरचना अउ सुविधा के जानकारी ले रिहिस।