अंजोर.बालोद,15। प्रदेश म चिटफंड कंपनी के बंद होए के बाद अब लगभग सबो कंपनी के मालिक मनके गिरफ्तारी होगे हावय। अब लोगन मन अपन जमा पूंजी के अगोरा म हावय। मूलधन के मिले के अब तक कोनो आसार तो नइ दिखे हावय। फेर पुलिस ले मिले आरो के मुताबिक एक अऊ फरार आरोनी के गिरफ्तारी होगे हावय। थाना बालोद अंतर्गत एम वे AIM-WAY कार्पोरेशन इंडिया लिमिटेड कंपनी शाखा बालोद म एजेन्ट के माध्यम ले सन 2013 म 2,50,000 रूपिया अउ सन 2014 म 2,50,000 रूपिया प्रार्थीया राजकुमारी यादव पति स्व. किसनलाल यादव निवासी दल्लीराजहरा ह अपन एस.बी.आई. खाता ले रिटायरमेंट के पैसा निकाल के बालोद एम वे कार्पोरेशन इंडिया लिमिटेड कंपनी म पैसा जमा करे रिहिसे। प्रार्थिया के पति के मृत्यु के बाद परिपक्वता के तिथि पूरा होए के बाद भी कंपनी पैसा वापस नइ करिस, ऑफिस बंद करके फरार होगे।
अइसने चिटफण्ड कंपनी कोति ले जिला बालोद के लगभग 150 निवेशक ले 25 लाख रूपिया के ठगी करे हावय। ये कंपनी म 4 मुख्य डायरेक्टर हावय डायरेक्टर सुनीता सिंह अउ मनोज अग्निहोत्री के 1000-1000 शेयर, डायरेक्टर धर्मेन्द्र सिंह अउ रवि कांबले के 22500-22500 शेयर हावय। डायरेक्टर सुनीता सिंह, मनोज अग्निहोत्री के गिरफ्तारी पहिली होगे हावय, रवि माधव राव कांबले पिता स्व. श्री माधव राव कांबले ल वड़गांव पुणे (महाराष्ट्र) ले विधिवत् गिरफ्तार करे गिस। येमा अऊ आन फरार डायरेक्टर के पता तलाश करत हावय पुलिस ह। ये प्रकरण के आरोपी के पतासाजी अउ गिरफ्तारी म उनि. शिशिर पाण्डेय, महिला प्रधान आरक्षक नर्मदा कोठारी, आरक्षक योगेश सिन्हा, आरक्षक संदीप यादव, आरक्षक विपिन कुमार गुप्ता अउ सायबर सेल ले आरक्षक पुरन देवांगन, आरक्षक मिथलेश यादव के सराहनीय भूमिका रिहिसे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।