अंजोर.रायपुर,29। विधानसभा क्षेत्र क्रमांक 24 मरवाही बर उप निर्वाचन के घोसना होगे। ये विधानसभा सीट अनुसूचित जनजाति मन खातिर आरक्षित हावय। चुनाव के घोसना के साथ ही संग जिला गौरेला-पेंड्रा-मरवाही विधानसभा क्षेत्र म आदर्श आचार संहिता लागू होगे। मुख्य निर्वाचन पदाधिकारी छत्तीसगढ़ ह आज प्रेस वार्ता म बताइन के 16 अक्टबूर तक नामांकन दाखिल होही अउ नाम वापसी 19 अक्टूरबर तक अऊ विधानसभा म 3 नवंबर के चुनाव होही। मतगणना खातिर 10 नवंबर के दिन के करार करे गे हावय। विधानसभा क्षेत्र म कुल 286 मतदान केंद्र बनाये गे हावय।
कोरोना महामारी ल देखत प्रशासन कोति जबर इंतजाम करे जावत हावय। मिले आरो के मुताबिक मतदान केंद्र ल मतदान दिवस के 1 दिन पहली सैनिटाइज करे जाही। प्रवेश द्वार म साबुन अउ पानी के व्यवस्था, सैनिटाइजर तको रइही। येकर अलावा मतदाता मनके थर्मल स्कैनर बुखार जांच करे जाही। बुखार रही त ओहा सबले आखरी म वोट करही। मतदाता मनला सोशल डिस्टेंसिंग नियम के पालन करवाये खातिर गोला ले चिन्हा बनाये जाही। मतदान करे बर अवइया ल मास्क लगाना जरूरी हावय। अइसने उम्मीद्वार मन तको घरो घर प्रचार के बखत सिरिफ पांच रइही (सुरक्षाकर्मी के छोड़)। रैली म 5 गाड़ी होगी अउ सरलग रैली तको नी करे सकय, आधा घंटा के अंतराल म करही। बाकी आन सबो नियम के पालन करत स्वास्थ्य विभाग के जारी कोरोना गाइडलाइंस के पालन करना अनिवार्य होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।