महासमुंद.11। महासमुन्द ल सिंघोडा क्षेत्र के अन्तर्राजीय चेक पोस्ट रेहटीखोल म संदिग्ध वाहन मनके जांच करत बखत स्वीफ्ट डिजायर कार जेन ओडि़शा कोति ले आवत रिहिस तेमा 4 किलो सोना के गहना अउ 32 लाख 84 हजार नकद मिले हावय। गाड़ी के पाछु सीट म चेम्बर बनाके अलग-अलग प्लास्टिक के बक्सा म सोना के गहना अउ नगदी रकम ल लुकाये रिहिसे।
ड्राइवर देवेन्द्र साहू, शरद शर्मा अउ भरत राजपूत ले नकदी रकम, जेवर के बारे म पूछताछ ले ज्वेलर्स दुकान सदर बाजार रायपुर के जेवर ल मालिक के केहे म उड़ीसा लेगना अउ बांचे ल वापिस लाना बताये हाबे। फेर ओमन कोनो कागजात नइ राखे हाबे नगद अउ जेबर के।
पुलिस कोति ले मिले आरो के मुताबिक गाड़ी ले नगदी 32,84,500 रुपिया अउ सोना के मंगल सूत्र 124 नग वजनी करीबन 1555.14 ग्राम, कालीपोत मोती 15 नग वजनी करीबन 57.85 ग्राम, सोन के चुड़ी 54 नग वजनी करीबन 1502.67 ग्राम, सोन के मुंदरी 189 नग वजनी करीबन 772.05 ग्राम, सोन के ब्रेसलेट 17 नग वजनी करीबन 347.830 ग्राम, सोन के लॉकेट 40 नग वजनी करीबन 116.890 ग्राम, सोन के बिस्कीट (टुकडा) 25 नग छोटे बड़े वजनी करीबन 510.24 ग्राम कुल सोना वजनी करीबन 4862.67 ग्राम कीमती करीबन 2,22,50000 रूपियो अउ गाड़ी स्वीफ्ट डिजायर ल पुलिस अभिरक्षा म राखे गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।