जोंक नदी के तिर डबरी म मिले नाबालिक के लास के गुत्थी सुलझाइस पुलिस, लुट अउ हत्या के आरोपी रायपुर म धराइस

अंजोर.बलौदाबाजार,22। कसडोल थाना के सोनाखान चौकी पुलिस ह पाछु दिन शनि मंदिर अउ जोंग नदी के बीच डबरी म नाबालिक नोनी के लास के गुत्थी सुलझावत आरोपी ल रायपुर ले रिस्तेदार के घर ले गिरफ्तार करे हाबे। मिले आरो के मुताबिक 18 सितंबर के कु.मानसी पिता मेला राम शाहजीत निवासी पचरीपारा कटगी सहेली तिर जाये बर निकले रिहिसे, संझा तक घर नइ लहुटिस, अऊ बिहनिया 19 सितंबर के गांव के शनि मंदिर अउ जोंक नदी के बीच के डबरी म मृत हालत म परे मिलिस। 

मउका म पहुंच के थाना प्रभारी, चौकी प्रभारी सोनाखान पहुंचके मर्ग अउ अपराध कायम करत विवेचना म लिस। जांच म पुलिस ल मृतिका के गला म पहिले सोन के लाकेट लूटे खातिर हत्या के आधार म हत्यारा के तलाश सुरू करिन। तभे पता चलिस के गांव के भक्कू उर्फ प्रेम देवांगन फरार हाबे, भक्कू देवांगन ल पम्प घाट जोंक नदी म मृतिका मानसी के साथ देखे के गवाह मिले के बाद आरोनी भक्कू देवांगन ल अपन दीदी के घर सडडू रायपुर ले थाना कसडोल लानिस। आरोनी ह प्रेम देवांगन उर्फ भक्कू ह मृतिका कु.मानसी ल गला म पहिने सोना के लाकेट लूटत बखत विरोध करे के सेती पथरा म मारके हत्या कर देना अउ सोना के लाकेट ल बालाजी ज्वेलर्स कटगी म 1400 रूपिया म बेचना बताइस। निशानदेही म बालाजी ज्वेलर्स कटगी ले मृतिका के सोना के लाकेट ल जप्त करे गिस।