रायपुर के मंदिर हसौद म बस अउ ट्रक के जबरदस्त टक्कर, ओडिशा ले सूरत जावत रिहिसे मजदूर ले भरे बस, मुख्यमंत्री दिस घायल मनके बने उपचार के निर्देश

रायपुर.05। राजधानी रायपुर के मंदिर हसौद म आज पहेट के बस अउ ट्रक म जबरदस्त टक्कर होगे। मिले आरो के मुताबिक बस ह ओडिशा के के गंजाम जिला के 70 मजदूर ल गुजरात के सूरत शहर लेगत रिहिस। तेज रफ्तार बस ह मंदिर हसौद के‍ तिर पहेट के 3:30 बजे के लगभग  एक ठी ट्रक ले टकरागे। टक्कर अतेक जबर रिहिस के 7 मजदूर मनके मउत अऊ केउ झिन घायल हावय। सबो घायल मनके इलाज रायपुर के अस्पताल म चलत हावय।

घटना के आरो पाके छत्तीसगढ़ के मुख्यमंत्री श्री बघेल ह हादसा म दुख प्रकट करत घायल मनके बने उपचार के अधिकारी मनला निर्देश दे हावय। राज्यपाल महोदया ह तको मृत मजदूर मनके प्रति संवेदना प्रकट करत, घटना म घायल मनके लघियात बने होए के प्रार्थना करे हाबे। घटना के बाद ओडिशा सरकार तको छत्तीसगढ़ सरकार के संपर्क म हावय अउ सरलग उपचार ल लेके गोठबात करत हावय।