अंजोर.भाटापारा,26। पइसा के नशा म चूर लोगन मन इंसान ल तको बेच खावत हाबे। मया के जाल म फांस के नारी परानी ल बाजार म बइठा के बोली लगाने वाला मयारूक कलंख आए समाज बर। अऊ इही सेती शर्मिंदा होथे पुरूष प्रधान समाज फेर जब मउका म पुलिस ह अपन सक्रियता देखाथे तव बड़े ले बड़े अपराधी तको फांदा म लपटा जथे। अइसने एक मानव तस्करी के मामला ल भाटापारा पुलिस ह सुलझाये हाबे। न सिरिफ ओरोपी ल दबोचे हाबे बल्कि रेस्क्यू करके लड़की ल तको वापिस लहुटाके लाने हाबे।
पढ़व रेस्क्यू आपरेशन के पूरा कहानी पुलिस के बताती :
पुलिस के मुताबिक मामला अइसन हाबे के प्रार्थिया कोति ले गुमशुदा लडकी के संबंध म रिपोर्ट दर्ज कराई रिहिसे के ओकर लडकी गुजरात म कहू हावय, फोन म बात होइस। जेमा पुलिस अधीक्षक के दिशा निर्देश म निवेदिता पाल अतिरिक्त पुलिस अधीक्षक अउ के.बी. द्विवेदी एसडीओपी भाटापारा के निर्देशन म एक टीम बडोदरा, गुजरात रवाना करे गे रिहिसे। पुलिस टीम अपन काम ल पूरा करके गुमशुदा लड़की ल थाना भाटापारा लाने हावय।
पूछताछ म लड़की ह बताइस के करीब एक साल पहिली दीपक यदू उर्फ गोलु यदू ल ओकर प्रेम संबंध रिहिस। फेर लडका के घर वाला मन आन जाति के सेती मना कर दिस। तभो ले दीपक यदू ह लड़की ल भाटापारा स्टेशन बलाके जबरन ट्रेन म बैठा के दूनो बिलासपुर चल दिस। उहां दीपक यदु अउ आमगांव के दू लड़का (पिंटा मराठी उर्फ बंटी अउ आन ह) खाना म नशीला दवई खवाके बेहोश करके आमगांव लेगे। उहां आमगांव म अशोक पाटले के किराये के मकान म पीडि़ता ल बांधके राखे रिहिन। लड़की के बताये मुताबिक सामुहिक दुष्कर्म तको करे गे हावय, उहां एक अऊ लड़की रिहिसे जेला बालाघाट ले लाने रिहिन।
तीन दिन बाद अशोक पाटले अउ बसंती लिलहरे निवासी चंद्रपुर, पप्पु उर्फ उमेश चुरे निवासी नागपुर, रमेश टाकलिकर निवासी नागपुर, पीडिता अऊ आन लड़की ल बेचे खातिर चंद्रपुर, नागपुर लेगिन। फेर सौदा नइ जमें म सुरत ले जाके फर्जी आधार कार्ड ओला विजय गुजराती ल डेढ़ लाख रूपिया म बेच दिस। मउका पाके उहां ले भागके पीडि़ता सुरत आगे अउ बडोदरा म अभिषेक शाह ले अपन मर्जी ले शादी करके रिहिसे। अऊ दूसर लड़की ल अशोक पाटले, बसंती लिलहरे अउ संजु गुजराती ह पोरबंदर म बेच दिस। उहू लड़की ल पुलिस ह रेस्क्यू करके लाने म कामयाब होए हाबे।
पीडि़ता के लिखित आवेदन म सबो आरोपी दीपक उर्फ गोलु यदू राम सागर पारा भाटापारा, अशोक पाटले निवासी आमगांव, बंसती लिलहरे निवासी चंद्रपुर, पप्पु उर्फ उमेश चुरे निवासी नागपुर, रमेश टाकलिकर निवासी नागपुर, पिंटा उर्फ बंटी निवासी आमगांव पिंटा के भाई अउ पिंटा के दोस्त, संजु गुजराती उर्फ राजू निवासी सुरत, विजय गुजराती निवासी सुरत के खिलाफ अपराध क्रमांक 370/2020 म धारा 376 (घ) 365,366,370,343,506 (बी), 120 (बी), 34 भादवि म पंजीबद्ध करके विवेचना म ले हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।