धमतरी.11। आंगनबाड़ी केन्द्र म बच्चा, गर्भवती अउ शिशुवती माता ल गरम भोजन देके फइसला राज्य शासन डहर ले करे गे हावय। जेन ल अवइया 16 सितंबर ले सुरू करे जाही, ये बात के जानकारी देवत कलेक्टर जय प्रकाश मौर्य जी ह आज महिला बाल विकास विभाग के बइठक लेके जरूरी तइयारी करे के निर्देश दिस। कोरोना संक्रमण ले बचाव बर सबो आंगनबाड़ी म रोज एक प्रतिशत सोडियम हाईपोक्लोराईट के घोल ले पोछा लगाये जाही जेकर ग्राम पंचायत ले इंतजाम करही। ओमन स्वास्थ्य विभाग ल निर्देशित तको करे हावय के महिला बाल विकास के अमला ल घोल तइयार करे के सही विधि बताये जाए।
आंगनबाड़ी कार्यकर्ता अउ सहायिका ल अनिवार्य रूप ले कपड़ा के मास्क लगाये, बच्चा मनके साबून ले हाथ धुलाना अउ दोपहर 12 ले 2 बजे तक लइका मनके आए के बेरा करार रइही। आंगनबाड़ी म दर्ज बच्चा, जेकर घर लकठा म हावय ओमन घर म लेग के तको खा सकहीं। अइसने गर्भवती अउ शिशुवती माता मन तको गरम भोजन ल आंगनबाड़ी म खाये के बजाए अपन घर लेग के खा सकथे। फेर ये बात के धियान राखे बर परही के कोनो बच्चा या गर्भवती, शिशुवती माता ल सर्दी, खांसी, बुखार होही या फेर उंकर घर म कोनो कोरोना संक्रमित मरीज होही त अइसन हितग्राही आंगनबाड़ी केन्द्र म झिन आए।
येकर अलावा सुपरवाइजर तको नियमित रूप ले क्षेत्र के दौरा करके कोरोना संक्रमण के बचाव के उपाय करत आंगनबाड़ी म गरम भोजन उपलब्ध कराहि। संग म ए.एन.एम. अउ आंगनबाड़ी कार्यकर्ता ह नियमित रूप ले टीकाकरण, गर्भवती महिला मनके चार बार ए.एन.सी. जांच अउ संस्थागत प्रसव सुनिश्चित करही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।