अंजोर.दिल्ली,24। नई दिल्ली म आज राष्ट्रीय सेवा योजना पुरस्कार 2018-19 समारोह के वर्चुअली आयोजन होइस, येकर आयोजन खेल अउ युवा मंत्रालय कोति ले करे गिस। कार्यक्रम के मुख्य अतिथि राष्ट्रपति श्री रामनाथ कोविंद रिहिन, केन्द्रीय खेल मंत्री किरण रिजिजू अउ राज्यपाल सुश्री अनुसुईया उइके तको वर्चुअल रूप म कार्यक्रम म शामिल होइन। ये मउका म राज्यपाल ह समारोह म सम्मानित छत्तीसगढ़ के बीसीएस शासकीय महाविद्यालय धमतरी के छात्र सत्येन्द्र साहू अउ शंकराचार्य इंजीनियरिंग महाविद्यालय भिलाई के छात्र राकेश कुमार ल शुभकामना दिस।
राज्यपाल महोदया ह उंकर उज्ज्वल भविष्य के कामना करत किहिन के ये गर्व के बात आए के छत्तीसगढ़ के राष्ट्रीय सेवा योजना के दू स्वयंसेवक राष्ट्रीय स्तर पर सम्मानित होए हाबे। एन.एस.एस. युवा म राष्ट्रप्रेम अउ नेतृत्व के भावना के विकास करथे। उंकर बुता ले पूरा समाज ल प्रेरणा मिलथे। जानबा होवय के सत्येन्द्र अउ राकेश कुमार ल श्रेष्ठ स्वयंसेवक के रूप म राष्ट्रीय सेवा योजना के राष्ट्रीय पुरस्कार (स्वयंसेवक श्रेणी के अंतर्गत) प्राप्त होइस, जेमा अंतर्गत प्रशस्ति पत्र, चांदी के मेडल अउ 1,00,000 रूपिया वर्चुअली प्रदान करे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।