रायपुर.28। छत्तीसगढ़ विधानसभा म आज छत्तीसगढ़ी भाषा ल संविधान के 8वां अनुसूची म सामिल कराये खातिर मुख्यमंत्री श्री भूपेश बघेल कोति ले राखे शासकीय संकल्प सर्वसम्मति ले पारित कर दे गिस। मुख्यमंत्री ह ये शासकीय संकल्प रखत करत किहिन के छत्तीसगढ़ी ल राजभाषा के दर्जा मिलगे हावय। फेर छत्तीसगढ़ी भाषा अभी तक संविधान के 8वां अनुसूची म सामिल नी हो पाये हावय। छत्तीसगढ़ी भाषा के विकास अउ मान्यता खातिर छत्तीसगढ़ी भाषा ल संविधान के 8वां अनुसूची म सामिल होना जरूरी हावय।
ये मउका म मुख्यमंत्री ह सदन म बताइन के ओमन ये संबंध म अशासकीय संकल्प लाइन, जोन पारित नइ हो पाइन। येकर बाद एक साल तक वातावरण बनाये खातिर साहित्यकार, कवि मनके अलावा बिलासपुर, दुर्ग, भिलाई, राजनांदगांव म संगोष्ठी आयोजित करे गिस। साल 2007 म ओमन फेर विधानसभा म छत्तीसगढ़ी भाषा ल संविधान के 8वां अनुसूची म सामिल करे खातिर अशासकीय संकल्प लानिस, जेन समवेत स्वर म पारित होगे।
पाछू सरकार ह तको भारत सरकार ल छत्तीसगढ़ विधानसभा म छत्तीसगढ़ी भाषा ल संविधान के 8वां अनुसूची म शामिल कराये खातिर प्रस्ताव भेजे रिहिन। गजब अकन क्षेत्रीय भाषा आठवीं अनुसूची म सामिल होइस, फेर छत्तीसगढ़ी भाषा संविधान के 8वीं अनुसूची म सामिल नइ हो पाइस।
श्री बघेल आगू किहिन के हमर सरकार छत्तीसगढ़ी तीज-तिहार, खान-पान, रहन-सहन ल बढ़ावा देवत हावय। अब मंत्रालय म तको अधिकारी-कर्मचारी मन छत्तीसगढ़ी सीखत हावय। अधिकारी-कर्मचारी कार्यक्रम म स्वागत भाषण अउ आभार प्रदर्शन छत्तीसगढ़ी भाषा म करना शुरू कर दे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।