बाढ़ प्रभावित क्षेत्र पुसौर, सरिया, सारंगढ़ म जिला कलेक्टर अउ अउ एसपी के सघन दौरा, बांटिस कपड़ा नमकीन अउ बिस्किट

रायगढ़.31। छत्तीसगढ़ म होए तीन दिन के जबर झड़ी पानी ह सबो कोति रार मचाये हाबे। मिले आरो के मुताबिक जिला रायगढ़ के पुसौर, सरिया अउ सारंगढ़ के कई गांव म पानी हमागे रिहिस। रायगढ़ कलेक्टर श्री भीम सिंह अउ एसपी श्री संतोष कुमार सिंह ह पुसौर-सरिया-सारंगढ़ म बाढ़ प्रभावित मन खातिर बने राहत शिविर म जाके बेवस्था के जायजा लिस। ये मउका म ओमन प्रभावित मनके समस्या सुनिस अउ अधिकारी मनला बने बेवस्था करे के तुरते निर्देश दिस। कलेक्ट़र ह लोगन मन खातिर सुपाच्य भोजन अउ साफ-सफाई के बने बेवस्था के अलावा मवेशी मन खातिर सूखा चारा के इंतजाम करे के निर्देश दे हावय। 

एसपी श्री संतोष कुमार सिंह ह थाना प्रभारी मनला क्षेत्र के समाजिक संस्था के मदद ले राहत शिविर म नियमित रूप ले फूड, मेडिसिन अऊ आन जरूरी समान उपलब्ध कराये के निर्देश दिस। ये मउका म सारंगढ़ मारवाड़ी महिला समिति कोति ले थाना प्रभारी सारंगढ़ आशीष वासनिक ल मिले राहत शिविर खातिर कपड़ा, नमकीन अउ बिस्किट पैकेट बांटे गिस।