पूर्व राष्ट्रपति भारत रत्न प्रणब मुखर्जी के निधन म राज्य शासन घोसित करिस सात दिन के राजकीय शोक

रायपुर.31। भारत के पूर्व राष्ट्रपति, भारत रत्न, वरिष्ठ कांग्रेस नेता प्रणब मुखर्जी जी के निधन के आरो पाके प्रदेश के सबो बड़का नेता मन श्रद्धांजलि दे हावय। ये मउका म प्रदेश के मुखिया श्री बघेल ह पूर्व राष्ट्रपति प्रणब मुखर्जी के जीवन के अनमोल बेरा ल सोरियावत 31 अगस्त ले 6 सितम्बर तक राजकीय शोक घोसित करे हावय। राष्ट्रीय ध्वज आधा झुके रइही, शासकीय स्तर म कोनो मनोरंजन, सांस्कृतिक कार्यक्रम आयोजित नी होवय।

 

ओमन किहिन के पूर्व राष्ट्रपति भारत रत्न श्री प्रणब मुखर्जी के निधन राष्ट्र खातिर अपूरनीय क्षति आए अउ अइसन दुख के बेरा म परिजन के प्रति संवेदना प्रकट करत हवं। श्री मुखर्जी ह अपन छत्तीसगढ़ के यात्रा आदिवासी बहुल जिला नारायणपुर म जनजाति कल्याण विभाग के 500 सीटर छात्रावास अउ रामकृष्ण मिशन आश्रम के औद्योगिक प्रशिक्षण संस्थान के भवन के आधारशिला रखे रिहिन। 26 जुलाई 2014 के पंडित रविशंकर शुक्ल विश्वविद्यालय रायपुर के स्वर्ण जयंती दीक्षांत समारोह अउ 17 अप्रैल 2015 के भारतीय प्रबंधन संस्थान (आईआईएम) रायपुर के चतुर्थ दीक्षांत समारोह म तको शामिल होए रिहिसे।