संसदीय सचिव सुश्री शकुन्तला साहू करिस लवन सामुदायिक अस्पताल खातिर एम्बुलेंस सेवा सुविधा के लोकार्पण

बलौदाबाजार.22। राज्य सरकार के स्वास्थ्य अउ परिवार कल्याण विभाग डहर ले सामुदायिक स्वास्थ्य केन्द्र लवन ल एम्बुलेंस सुविधा 108 मुहैया कराये गिस। ये मउका संसदीय सचिव अउ कसडोल विधायक सुश्री शकुन्तला साहू ह अस्पताल परिसर म पूजा-अर्चना करके एम्बुलेंस ल हरियर झण्डी देखाके मरीज लाने खातिर रवाना करिन। सुश्री साहू ह किहिन के एम्बुलेंस सेवा के जरूरत ल धियान म राखत, प्रयास करके तुरते उपलब्ध करायेन। अब जरूरत पड़े म तत्काल एम्बुलेंस मिलही अऊ लघियात अस्पताल लानके बने इलाज करे जा सकही।

 

डीपीआर ले मिले आरो के मुताबिक ओमन अस्पताल पहुंच के कुछ मरीज मनले मुलाकात करत उंकर हाल-चाल तको जानिस। संसदीय सचिव ह आगू किहिन के कोरोना के खतरा अभी टले नइये। प्रकरण म रोज बढ़ोतरी होतव हाबे। ये सेती अऊ जादा सावधान राहव, मास्क, साबुन ने हाथ धुलाई अउ सेनेटाईजर के उपयोग करते रहना चाहि। सीएमएचओ डॉ. सोनवानी ह कोरोना ले बचाव अउ इलाज खातिर जिला प्रशासन के नेतृत्व म करे जावत प्रयास ले संसदीय सचिव ल अवगत कराइन। ये मउका म तहसीलदार प्रियंका बंजारा, बीपीएम विकास जायसवाल, सहित देवीलाल बार्वे, अजय ताम्रकार, प्रताप डहरिया, मृत्युंजय पाण्डेय, मनोज पाण्डेय, दयाशंकर कुर्रे, अभिषेक पाण्डेय, मृत्यंजय वर्मा, महेश कुर्रे, रूपचंद मनहरे, बनवारी बार्वे, तिरेन्द्र बहादुर कुर्रे, दीपमाला अनंत, गंगाबाई रात्रे, राधेश्याम रात्रे, कांति मनहरे अउ पंकज साहू आदि उपस्थित रिहिन।