मुख्यमंत्री निवास म मनाये गिस पोरा-तीजा तिहार, जुरियाइन राज्य के बहिनी-बेटी

रायपुर.18। छत्तीसगढ़ के लोक संस्कृति अउ परंपरा के संरक्षक अउ संवर्धक मुखिया श्री भूपेश बघेल जब ले सत्ता म आए हाबे सिरतोन म लागथे छत्तीसगढ़ी रंग चारो मुड़ा फेर बगरत हाबे। पाछू 20 बछर के तुलना म हमर लोक संस्कृ‍ति के बड़वार म ये 18 महीना गजब हाबे। 

आज अन्न अउ पशुधन ले जुरे लोक परब पोरा के ओढ़र म मुख्यमंत्री निवास म सुघ्घर पोरा-तीजा के जबर जलसा के आयोजन करे गे रिहिसे। जेमा लोक संस्कृति के झांकी संग जम्मो रीति-रिवाज के जुन्ना परंपरा तको देखे बर मिलिस। मुखिया जी ह राज्य के जुरियाए बहिनी-बेटी मन संग मिलजुल के जाता-पोरा अउ नंदिया बइला के पूजा अर्चना करे के बाद भगवान शिव के प्रतीक शिवलिंग के पूजा करके प्रदेश के सुख-समृद्धि अउ खुशहाली के कामना करिन।