रायगढ़ एटीएम लूट म घायल गार्ड ले मिलिस पुलिस के अफसर, 50000 रूपिया के दीस आर्थिक मदद

रायगढ़.07। रायगढ़ म होए तीन करोड़ चौदह लाख रूपिया के डकैती अउ हत्या म आरोपी मनला लघियात धरे के सेती पुलिस के जवान मनला प्रशासन कोति ले 50000 रूपिया के प्रोत्साहन राशि दिये गे हाबे। जानबा होवय के कोतरारोड़ एटीएम कांड म दू झिन ल गोली लगे रिहिसे। जेन एक के मउत होगे अउ दूसर घायल हाबे। पुलिस ह बड़का कार्यवाही करत बिहार के अपराधी मनला पिस्टल अउ रकम सहित धर दबोचे हाबे।

ये मउका म रायगढ़ के एसपी श्री संतोष सिंह ह लूट कांड म घायल गनमैन विनोद पटेल ले अस्पताल म भेट करिन। ओमन डॉक्टर मन ले हालचाल जानिस अउ गनमैन ल 50000 रूपिया के मदद करिन। साथ ही लूट कांड म अपन जान गवइया ड्राइवर के परिवार वाले मनला पुलिस ल मिले प्रात्साहन राशि 50000 रूपिया ल देके आरो रायगढ़ पुलिस ह अपन आधिकारिक ट्विटर के माध्यम ले दे हाबे।