डॉक्टर्स डे म प्रदेश के मुखिया ह चिकित्सक मनला दीस शुभकामना अउ बधाई

रायपुर.01। भारत रत्न डॉ. विधानचंद्र राय के सुरता अम्मर राखे खातिर मनाय जाने वाला ’डॉक्टर्स डे’ के मउका म प्रदेश के मुखिया श्री बघेल ह देश अउ प्रदेश के सबो चिकित्सक मनला हार्दिक बधाई अउ शुभकामना दे हाबे। श्री बघेल ह जारी संदेश म केहे हाबे के डॉक्ट्र मनके सेवा अउ समर्पण के प्रति सम्मान प्रगट करे खातिर हम हर साल एक जुलाई के नेशनल डॉक्टर्स डे मनाथन। मरीज ल नवा जीवनदान देवइया डॉक्टर ल धरती के भगवान तको केहे जाथे। समाज म उंकर प्रतिष्ठित अउ सम्मानजनक स्थान हावय।

मुख्यमंत्री ह किहिन के वैश्विक महामारी कोरोना के लड़ाई म डॉक्टर्स सैनिक के रूप म आगू आए हाबे। आज पूरा विश्व म अपन जान के परवाह नइ करत डॉक्टर मन हजार लोगन मनके जान बचावत हाबे। कोरोना वारियर्स के रूप म अपन सेवा अउ भूमिका ले डॉक्टर मन चिरस्थायी स्वर्णिम अध्याय लिखे हाबे।