चिटफंड कंपनी के डायरेक्टर मनके गिरफ्तारी के बाद भी लोगन ल नइ मिलत हाबे जमा रकम

राजनांदगांव.06। छत्तीसगढ़ म कुछ बछर पहिली चिटफंड कंपनी मन प्रसाशन के नाक तरी, शहर म बड़का कार्यालय खोलके खुले आम लोगन ले आने-आने स्कीम ले रकम जमा कराय। जानबा होवय के येकर जानकारी सबो ल रिहिस, कतकोन युवा मन कंपनी म रोजगार देखत अभिकर्ता के रूप म जुरके काम करे लगिस। दिन-दिन हजार ले लाखों रूपिया तक जमा होए के बाद अचानक शासन-प्रशासन जागिस अउ सबो कंपनी के धर पकड़ सुरू कर दिस। कतको के पइसा मिल पाइस, कतकोन के नइ मिल पाइस। शासन ह जनता ल दोस देवत हाबे अउ जनता ह शासन ल। 

अबतक के कार्यवाही ल देखे जाए तव प्रशासन ह अभिकर्ता मनके शिकायत के बाद ही चिटफंड कंपनी ऊपर कार्रवाई करत मालिक मनला गिरफ्तार करके जेल म डारे हाबे। प्रशासन ह प्रमुखता ले जनता के हित म चिटफंड कंपनी उपर कार्यवाही करे हाबे। कुछ मामला म कंपनी मालिक के साथ कार्यकर्ता मनके उपर तको कार्यवाही होए हाबे। ये बीच कई प्रदर्शन अउ आश्वासन के दौर चलिस। कुछ जिला प्रशासन ह लोगन ल जमा पूजी के ब्योरा तको मांगिस फेर वापसी के रद्दा अब तक नइ खुले हाबे। छत्तीसगढ़ के नवा सरकार ह तो कुछ अभिकर्ता संघ ले केहे तको रिहिन के मालिक के संपत्ति ले रकम के वापसी कराबो, इही आस म सरकार के भरोसा लोगन मन बइठे हाबे।  

इही कड़ी म आज चिटफंड कंपनी के खिलाफ कार्यवाही करत राजनांदगांव जिला के खैरागढ़ पुलिस ह सर्वोदय मल्टीट्रेड कंपनी लिमिटेड के आरोपी संचालक राजकुमार साहू, कमलेश कुमार कोठले, सत्यपाल वर्मा अउ छम्मन साहू ल गिरफ्तार करे हाबे। डीपीआर के मुताबिक आवेदक खिलावन चंद्राकर ह चिटफंड कंपनी संचालक के बताये मासिक स्कीम, फिक्स डिपोजिट स्कीम अउ एमआईएफ स्कीम म 7 लाख 30 हजार रूपिया, अऊ आन मनले लगभग 18 लाख रूपिया चिटफंड कंपनी सर्वोदय मल्टीट्रेड कंपनी लिमिटेड माइको इन्वेस्टमेंट कंपनी म जमा करे रिहिसे। ये मामला म 3 डायरेक्टर तरूण साहू,  रंजीत सोनकर निवासी जिला बालाघाट, राजेन्द्र स्वासी निवासी बिरसामुण्डा चौक रांची के गिरफ्तारी अऊ होही।