रायपुर.14। मुख्यमंत्री ह जिला जशपुर के दुलदुला विकासखण्ड के ग्राम झरगांव के रहइया नोनी कु. निर्मला बिरहोर ल रायपुर म सम्मानित करिस। निर्मला ल मुख्यमंत्री श्री बघेल ह स्वेच्छानुदान मद ले आगू के पढ़ाई खातिर एक लाख रूपिया अउ लैपटॉप दीस। निर्मला ह एसो के 12वीं कक्षा पास करे हाबे अउ वोहा कॉलेज तको जाना चाहथे। जशपुर जिला के कु. निर्मला अति पिछडी बिरहोर जनजाति वर्ग ले आथे। निर्मला ह गरीब परिवार के नोनी आए ओकर पिता कुंवर राम 5वीं पास हाबे अउ खेती बुता करथे, माता श्रीमती बिरसमनी बाई अशिक्षित हावय। कु.निर्मला शासकीय पोस्ट-मैट्रिक कन्या छात्रावास जशपुर म रही के शासकीय महारानी लक्ष्मी बाई कन्या उ.मा.वि. जशपुरनगर ले कक्षा 12वीं के परीक्षा 58 प्रतिशत अंक के साथ उत्तीर्ण करे हाबे।
बताये जावथे के निर्मला ह जिला म 12वीं कक्षा पास करइया बिरहोर समाज के पहिली बालिका आए। निर्मला अब उच्च शिक्षा खातिर महाविद्यालय म अध्ययन करन चाहत हाबे। अउ समाज के उत्थान खातिर शिक्षक बनके भविष्य म काम करना चाहत हाबे। जिला म बिरहोर जनजाति के कुल 161 परिवार हाबे जेमा कुल 515 सदस्य निवास करथे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।