छत्तीसगढ़ी लोककला अउ संस्कृति ल सहेजे खातिर ‘छत्तीसगढ़ संस्कृति परिषद’ ल मिलिस कैबिनेट के मंजूरी

रायपुर.15। छत्तीसगढ़ के लोककला अउ संस्कृति ल सहेजे, संवारे अउ ओला आगू बढ़ाये खातिर मुख्यमंत्री श्री भूपेश बघेल के मंशा के अनुरूप ‘छत्तीसगढ़ संस्कृति परिषद’ के गठन के प्रक्रिया शुरू होगे हाबे। ये परिषद म संस्कृति विभाग के समस्त इकाई ल एकरूप करे जाही। छत्तीसगढ़ संस्कृति परिषद के मुख्य काम राज्य म साहित्य, संगीत, नृत्य, रंगमंच, चित्र, मूर्तिकला, सिनेमा, आदिवासी, लोककला मनला प्रोत्साहन अउ संरक्षण देना होही। साथ ही परिषद सांस्कृतिक विरासत के पहचान,  संरक्षण अउ संवर्धन करही।

सृजनशील संस्कृति खातिर मंच, कला-संग्रहालय, वीथिका के विकास, प्रदेश म राष्ट्रीय स्तर के मंच के स्थापना के साथ ही अऊ आन आयोजन करही। सांस्कृतिक संस्था मनके सहयोग, प्रोत्साहन, सृजनकर्मि मनके सम्मान, प्रोत्साहन, उत्कृष्ट सिनेमा निर्माण अउ प्रचार संबंधी तको बुता करही। छत्तीसगढ़ संस्कृति परिषद के अंतर्गत साहित्य अकादमी, कला अकादमी, आदिवासी लोक कला अकादमी, छत्तीसगढ़ फिल्म विकास निगम, छत्तीसगढ़ सिंधी अकादमी, छत्तीसगढ़ राजभाषा आयोग आदि काम करही।