डेढ़ रूपिया किलो म गोबर खरीदी अउ पंद्रह दिन म भुगतान करे के मंत्रिमण्डलीय उप समिति करिस अनुशंसा

रायपुर.04। गोधन न्याय योजना के तहत किसान अउ पशुपालक ले डेढ़ रूपिया किलो के दर ले गोबर खरीदी करे के अनुशंसा कृषि मंत्री रविन्द्र चौबे के अध्यक्षता म गठित मंत्रिमण्डलीय उप समिति ह करे हावय। मंत्रिमण्डलीय उप समिति के बइठक आज इही संबंध म बीज भवन म आयोजित होइस जेमा वन मंत्री मोहम्मद अकबर, सहकारिता मंत्री डॉ. प्रेमसाय सिंह टेकाम, नगरीय प्रशासन मंत्री डॉ. शिवकुमार डहरिया शामिल होइन। 

जानबा होवय के छत्तीसगढ़ राज्य म गोधन के संरक्षण, सवंर्धन, वर्मी कम्पोस्ट के उत्पादन ल बढ़ावा दे अउ ग्रामीण मनके अर्थव्यवस्था ल बेहतर बनाये के उद्देश्य ले गोधन न्याय योजना के शुरूआत हरेली तिहार ले होवइया हाबे। ये संबंध म आगू बताये गिस के गौठान समिति या नामित समूह कोति ले घर-घर जाके गोबर सकेले जाही। येकर बर खरीदी कार्ड के तको बेवस्था करे बर परही जेमा रोज के गोबर के मात्रा अउ राशि के उल्लेख करे जाही। समिति ह किसान अउ पशुपालक मनके गोबर के एवज म पाक्षिक भुगतान करही। बइठका म आगू मंत्री अउ अधिकारी मनके बीच गोधन न्याय योजना ल लेके चर्चा करत गोबर के खरीदी ले लेके खातू बने के बाद ओला बेचे तक के कार्य योजना बनाये गिस।