आंगनबाड़ी कार्यकर्ता मनला फर्जी फोन कॉल्स ले सचेत रहे अउ ठगी ले बांचे के सलाह दीस विभाग

रायपुर.26। महिला अउ बाल विकास विभाग ह आंगनबाड़ी कार्यकर्ता मनला फर्जी फोन कॉल्स ले सतर्क रहे अउ ठगी ले बांचे के सलाह दे हाबे। ये संबंध म विभाग ल आरो मिले हाबे के कतकोन जिला के आंगनवाड़ी कार्यकर्ता मनला गजब फर्जी फोन कॉल आवत हाबे। कॉल करइया मन कार्यकर्ता मनला आनी बानी के लालच देवत हाबे के उंकर पदोन्नति कराबो। डीपीओ, सीडीपीओ या राज्यस्तरीय अधिकारी मनके नाम लेके रूपिया के मांग करथे, कतकोन के बैंक खाता के जानकारी तको मांग लेथे। 

डीपीआर के मुताबिक महिला अउ बाल विकास विभाग के संचालक श्रीमती दिव्या मिश्रा ह अइसन फोन कॉल ले बांचे के सलाह देवत कोनो भी प्रकार के जानकारी आन मनला नइ दे बर केहे हाबे। ओमन आगू किहिन के शासकीय नियम अउ प्रक्रिया के अनुसार ही कार्य सम्पादित होवत हाबे। आंगनबाड़ी कार्यकर्ता मनला काकरो बात म नइ आना हाबे अऊ कोनो फर्जी फोन आये म पुलिस या अपन अधिकारी ल तुरते आरो करय।