बेनाम बादशाह फिलिम के सुघ्घर गीत ‘आज मिलन हे सोनपरी ले’ यूट्यूब म : प्रणव झा

फीचर.21। छत्तीसगढ़ फिलिम म नवाचार करइया छोटे शहर के बड़े निर्देशक प्रणव झा के नाम तको फिलिम के सफलता के गारेंटी देथे। अबतक प्रणव झा के सबोच फिलिम ल सबो वर्ग के दर्शक मन गजब पसंद करे हाबे। उंकर निर्देशन ले निखरके आज कतको कलाकार मन छॉलीवुड म नाम अउ शोहरत कमावत हाबे। प्रणव जी के इही साल फरवरी म छत्तीसगढि़या मनके हक अउ अधिकार ल लेके करन खान अउ मुस्कान साहू स्टार्र बेनाम बादशाह रिलीज होए रिहिसे।

दर्शक मन बड़ दिन ले बेनाम बादशाह ल यूट्यूब म देखे के अगोरा करत रिहिन। फिलिम तो नहीं फेर अब दर्शक मन गाना के आनंद ले सकत हाबे। एसआरके म्यूजिक म ‘मऊहा झरे’, ‘जोड़ी मोर धनी मोर’ के बाद अब 20 जनू के ‘आज मिलन हे सोन परी ले’ अपलोड होगे हाबे। करन खान अउ मुस्कान साहू अभिनीत ‘आज मिलन हे सोनपरी ले’ म दूनो के बिहाव के बाद के मया ल रेखांकित करे गे हाबे। गीत अउ संगीत तो गजब सुघ्घर हाबे फेर दर्शक मनला फिलिम के पूरा-पूरा फिल्मांकन देखे बर नइ मिलय। फिर भी जतका क्लिपिंग देखे बर मिलथे सोज्झे दिल म उतरथे, अऊ घेरी-बेरी सुने के मन करथे।