रायपुर.22। अभनपुर के सरकारी अस्पताल म एक दिन के लइका चोरी होगे रिहिस। जानकारी के मुताबिक अभनपुर पलौद निवासी राधेश्याम धीवर के पत्नी खेम कुमारी धीवर के अभनपुर सरकारी अस्पताल म 20 जून के बिहनिया 8 बजे लड़का होइस। राधेश्याम लइका अउ महतारी दूनो ल बने देखके अपन सास ल लाने बर ससुरार ग्राम कोमा चल दिस। उहां ले आए के बाद देखिस तव लइका वार्ड म नइ रिहिसे अउ महतारी ह बदहवास रोवत रिहिस। पूछे म बताइन के कोनो अनचिनहार ह गुलाबी रंग के लुगरा पहिरे, लइका ल डांक्टर ल देखाके लानत हव किके लेगिस अउ लानबे नइ करिस।
एक दिन के लइका के चोरी होए के रिपोर्ट अभनपुर थाना म 0241/2020 म दर्ज होये के बाद पुलिस ह भादंसं 1860 के धारा 363 के तहत कार्यवाही करत आरोपी ल 24 घंटा के भीतर दुर्ग ले गिरफ्तार करे हाबे। एसएसपी आरिफ शेख कोति ले मिले आरो के मुताबिक रायपुर पुलिस अपहरण के भंडाफोड़ करत आरोपी भाई-बहिनी मनला दुर्ग ले गिरफ्तार करे गिस। अउ पुलिस लइका ल वापिस अस्पताल लाके उंकर महतारी ल सउप दीस। आरोपी मन अपन अपराध कबुलत बताये हाबे के उंकर लोगलइका नइ होए के सेती ये घटना ल अंजाम दिस, पुलिस कोति ले आगू के कार्यवाही जारी हाबे।
@RaipurPoliceCG cracked the kidnapping of 1 day old baby in Abhanpur within 24 hours and arrested the accused from durg. The baby was handed over to the mother along with goodies n wishes from #Raipurpolice @ABPNews @TOIIndiaNews @htTweets @ndtvindia @ChhattisgarhCMO pic.twitter.com/ovgo8h4IIp— Arif Shaikh (@arifhs1) June 21, 2020
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।