उत्तरप्रदेश जवइया मन खातिर रायपुर ले 5 जून के रवाना होही स्पेशल ट्रेन

रायपुर। कोरोना काल म छत्तीसगढ़ म फदके आन राज के मजदूर मनके वापसी धीरे-धीरे चलते हाबे। राज सरकार कोति ले आरो मिले हाबे के लॉकडाउन म फंसे उत्तरप्रदेश के लोगन मन खातिर 5 जून के राजधानी रायपुर ले बस्ती उत्तरप्रदेश बर स्पेशल रेलगाड़ी रवाना होही। ये स्पेशल ट्रेन के रवानगी खातिर श्रम विभाग के सचिव अउ राज्य नोडल अधिकारी सोनमणि बोरा ह सबो जिला कलेक्टर ल उंकर जिला म फंसे उत्तरप्रदेश के लोगन मनके वापसी खातिर चलइया रेलगाड़ी के आरो देवत रायपुर कलेक्टर ल इतला करे के निर्देश दे हाबे। रायपुर कलेक्टर ह सबो यात्री मनके चिकित्सा जांच, नाम, मोबाईल नंबर, उंकर ठऊर-ठिकाना के जानकारी लेके ट्रेन छूटे के अगाहू सूची ल उत्तरप्रदेश शासन ल उपलब्ध कराही।