- राम वन गमन पर्यटन परिपथ विकसित करे खातिर छत्तीसगढ़ के 9 स्थल के चयन, 137 करोड़ 45 लाख रूपिया के लागत के कॉन्सेप्ट प्लान तइयार
- पर्यटन, धर्मस्व अउ धार्मिक न्यास विभाग के काम-काज के समीक्षा बइठका लिस पर्यटन अउ धर्मस्व श्री साहू
रायपुर.06। प्रदेश के पर्यटन अउ धर्मस्व मंत्री ताम्रध्वज साहू ह राम वन गमन पर्यटन परिपथ के पहिली चरन के चयनित 9 स्थल म चंदखुरी के विस्तृत परियोजना प्रतिवेदन के प्रस्तुतीकरण के अवलोकन करिन। ओमन चंदखुरी म माता कौशल्या के मंदिर अउ उहां के तरिया, घठौंदा के सौंदर्यीकरण, ज्योति कलश कक्ष, मंदिर परिसर के चारों मुड़ा औषधीय अउ फलदार पौधा, आसपास समतलीकरण के साथ ही मंदिर परिसर के पुल के चौड़ीकरण के निर्देश दिस। जानबा होवय के छत्तीसगढ़ म राम वन गमन पर्यटन परिपथ विकसित करे खातिर 9 स्थल के चयन के गे हाबे, जेकर बर 137 करोड़ 45 लाख रूपिया के लागत के एक कॉन्सेप्ट प्लान बनाये गे हाबे। ये स्थल मनला केन्द्र सरकार के स्वदेश दर्शन योजना के तहत पर्यटक मनके सुविधा खातिर विश्वस्तरीय विकसित करे के प्रावधान हाबे।
चयनित स्थल म सीतामढ़ी-हरचौका जिला कोरिया, रामगढ़ जिला सरगुजा, शिवरीनारायण जिला जांजगीर-चांपा, तुरतुरिया जिला बलौदाबाजार, चंदखुरी जिला रायपुर, राजिम जिला गरियाबंद, सिहावा-सप्तऋषि आश्रम जिला धमतरी, जगदलपुर जिला बस्तर अउ रामाराम जिला सुकमा शामिल हाबे।
एजेंसी ले मिले आरो के मुताबिक राम वन गमन पर्यटन परिपथ खातिर राज्य शासन कोति ले पाछू वित्तिय वर्ष 2019-20 म 5 करोड़ अउ चालू वित्तीय वर्ष 2020-21 म 10 करोड़ रूपिया के प्रावधान बजट म करे गे हाबे। पर्यटन अउ धर्मस्व मंत्री श्री साहू ह निवास कार्यालय म विभागीय काम-काज के समीक्षी करत छत्तीसगढ़ के सबो धार्मिक स्थल अउ मेले-मड़ई के सूची बनाये बर कहिन जेकर ले आयोजित होवइया धार्मिक आयोजन, मेले-मड़ई, महोत्सव ल ध्यान म राखत ओ ठउर के जरूरी मरम्मत काम हो सकय। ये मउका म सचिव पर्यटन पी.अन्बलगन अउ छत्तीसगढ़ पर्यटन मंडल के प्रबंध संचालक सुश्री इफ्फत आरा सहित अऊ आन विभागीय अधिकारी मन उपस्थित रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।