महासमुंद.22। महासमुंद के बागबाहरा पुलिस ल नगर पालिका कार्यालय तिर वाहन जांच करत बखत एक ठी ट्रेक्टर ट्राली म भारी मात्रा म गांजा मिलिस। जानकारी के मुताबिक गांजा तस्करी के आरोपी उदाराम गुर्जर अउ प्रकाश चौधरी दूनो राजस्थान के रहइया आए जेन ह अपन ट्रेक्टर ट्राली म 190 किलो गांजा जेकर कीमत लगभग 9,50,000 रूपिया होही, लुकाये रिहिसे। दूनो आरोपी मन उपर स्वापक औषधि अउ मनःप्रभावी पदार्थ अधिनियम, 1985 के धारा 20 (b) के तहत दर्ज करके विवेचना म लिये गे हाबे।
थाना प्रभारी स्वराज त्रिपाठी के मुताबिक ये नवा तरीका आए गांजा तस्करी के जेमा ट्रेक्टर के ट्राली म अलग से वेल्डिंग कराके बक्सा बनाये गे रिहिसे। एफआरआई मुताबिक वाहन चेकिंग करत एक ट्रेक्टर मैसी फर्गुसन RJ 21 RE 3398 ट्राली ल रोके गिस जेमन खरियार रोड कोति ले आवत रिहिसे। पूछे म बताइन के ओमन राजस्थान के आए। पुलिस जब उडिसा कोति ले आए के कारन पुछिस तव नी बता पाइन ओमन। बाद म ट्रेक्टर के बने जांच करे के बाद जेन दिखिस ओला देख के सबो दंग रहिगे। आरोपी मन ट्रेक्टर ट्राली के चेचिस कना नवा बक्सा बनवाये रिहिसे जेमा प्लास्टिक झिल्लीग लपटाए 36 पैकेट गांजा निकलिस। उदाराम गुर्जर पिता भेरूराम, दातारामगढ जिला सीकर राजस्थान अउ प्रकाश चौधरी पिता गिरधारी चौधरी, जिला नागौर राजस्थान के विरूद्ध अपराध धारा 20(ख) एनडीपीएस एक्ट के घटित पाये अउ अपराध स्वीकार करे के बाद विधिवत गिरफ्तार करे गिस। मामला ह महासमुंद के थाना बागबाहरा म 0107/2020 म दर्ज हाबे अउ आगू के कार्यवाही जारी हावय।
नए पैतरे के साथ भारी मात्रा में गांजा परिवहन करते नशे के सौदागरो को महासमुंद पुलिस ने दबोचा— Mahasamund Police (@MahasamundP) June 22, 2020
ट्रैक्टर ट्राली के चेचिस के पास बॉक्सनुमा खाना में 36 पैकेट गांजा कुल 190 किलो कीमत लगभग 9,50,000 रुपए को जप्त pic.twitter.com/GtRAkJJjr1
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।